Lima buah stesyen deka digaga mungkur ungkus RM15 juta sebuah

KUCHING: Bisi lima buah stesyen endur ngechas entukar dikumbai tiga dalam satu tauka ‘3-in-1’ beungkus RM15 juta sebuah deka digaga ba Sarawak.

Kepala Menteri Sarawak Datuk Amar Abang Johari Tun Openg mansutka pekara nya pengudah ngelancharka kilang pengeluar enggau stesyen hidrogen keterubah ba Opis Sarawak Energy Berhad (SEB) di Bintawa, tadi.

“Lima buah stesyen kuasa tu deka nyendiaka tiga bengkah kuasa iya nya minyak, elektrik enggau hidrogen dalam sebuah stesyen.

“Kami udah ngasuh Petros enggau Opis Pemansang Ekonomi Sarawak (SEDC) ngiga palan stesyen tu lalu udah ngelala lima buah palan manah ti beungkus RM15 juta sebuah,” ku iya.

AUM PEMBERITA…Kepala Menteri Sarawak Datuk Amar Abang Johari Tun Openg (tengah) nyaut tanya pemberita pengudah ngelancharka kilang pengeluar enggau stesyen hidrogen keterubah ba Opis Sarawak Energy Berhad (SEB) di Bintawa, kemari. Bela dipeda Rundi (kanan) enggau Masing.

Iya nandu, pekara nya agi dalam pansik lalu rega palan lebih murah laban agi baru tang lima palan nya deka dipadah enda lama agi.

Ba pekara bukai, Abang Johari nusi udah bisi menua luar mantai ke pengingin ati ngagai sumber hidrogen ti dipejalai ba Sarawak.

“Tu agi dalam proses berunding, bisi sebuah menua udah deka meranak puku muka loji kena ngasilka hidrogen ba Sarawak lalu udah nya sida deka meli baru hidrogen nya.

“Menua nya deka nganti kuasa nuklear ngagai hidrogen ti ditemu selamat lalu enti kitai ulih nyual hidrogen tu tentu mayuh agi meri penguntung ngagai Sarawak,” ku iya.

Nangkan ke nya, Abang Johari madah diatu sida agi nganti pemutus Opis Perengka Pengangkut Darat (JPJ) ngemendarka lisin ngena bas elektrik sel hidrogen laban JPJ bedau bisi lisin bas ngena hidrogen.

“Awakka JPJ ngemas baru undang-undang sida laban diatu Sarawak udah dulu maju ke mua.

“Engka minggu dudi enti udah bisi pemutus bas elekrtik sel hidrogen ulih dikena laban udah tentu sida JPJ berundingka pekara tu,” ku iya.