KUCHING: Bemalinka tengkebang kasut Jimmy Choo, siku penengkebang setail menua Sarawak udah nengkebang pengelain ba tengkebang kasut tunjik ari kain tenun asal iya nya pua kumbu.

Peranak asal Kapit, Cleveland Dian, 25 taun, anak penengkebang fesyen Datin Malia Gelen ke mega ngempu De’ Mlya Pua Kumbu madahka penemu ditibak ari gaya kasut tunjik ti kala ditengkebang Jimmy Choo, ari pua kumbu.

“Ketegal pengangkun, indai aku kala nemuai ke menua China ngiga kilang kasut ti ulih nengkebang setail kasut tunjik ti ditibak ari penemu iya.

“Kami deka ngelangkar setail pua kumbu ditu lalu deka dikempat nitihka pemesai enggau setail kasut tunjik dikedeka sebedau dianjung ke menua China ngambika dijait,” ku iya lebuh dirandau ba Tamu Gawai Dayak SDNU 2019 di Christian Ecumenical Workship Center (CEWC) apin lama ke udah.

Pia mega ku iya, genap langkar tu bisi tatak baka tengkebang keterubah semina bisi sepuluh pasang kasut aja.

EKSLUSIF… Entara gaya kasut tunjik ditibak ari penemu Cleveland enggau indai iya, Datin Malia.

Setail keterubah kasut tunjik nerima timbal manah amat lalu semilan pasang mujur dijual ngena rega RM200 sepasang.

“Bemalinka setail eksklusif semina beberapa pasang aja ti ulih ditengkebang ba genap setail kasut tunjuk laban ditatak sereta bepanggai ba pua kumbu tu ditenun ngena chara lama.

“Dikena nembuka siti setail tenun tulin pua kumbu manggai bebulan pengelama,” ku iya nambah.

Penulin tenu pua kumbu ari penau jari Jati Ju (ini) enggau ibu iya benama Nora Inggong enggau Mading Inggong.

Bemacham gaya langkar udah dikena sida sebilik ditenun nyadi pua kumbu ti manah baka paku keru, sangkuh enggau bungai.

“Naka diatu, kami mujur nengkebang sepuluh setail kasut ari tenun tulin pua kumbu, ari sandal ngagai kasut tunjik,” ku iya nambah.

Kelimpah ari nya ku iya, kasut tunjik pemadu baru deka ditengkebang deka nunda singkang pemansang setail, moden sereta bisi gawa nitihka peminta.

“Rega sepasang kasut tunjik ari RM400 enggau tinggi agi,” ku Cleveland madah nyemetak.

Setail kasut chap De’ Mlya mega mujur rembus ba makit ekslusif di Kuala Lumpur lalu deka dibai ngagai makit menua luar enda lama agi.

Sebedau tu, Datin Malia Gelen suah ngulu minggu setail ba sebarang program penengkebang setail di Sarawak baka Gala Borneo Fashion Week 2018 di Hotel Pullmen Kuching ti mantaika gaya pekayan, kasut enggau kantung ari tenun pua kumbu.