LUBOK ANTU: Bantu belanja penyampau RM200,000 ari Kaban Parlimen Lubok Antu Jugah Muyang dikena nyaup ngentak baru 23 pintu Rumah Minggat Mujah, Skrang ditu.

Ku Jugah, pemeri nya beserimbai enggau pengerami Mantar Gawai Rumah Minggat Jampi, Mujan Skrang apin lama ke udah.

Bela ampit nerima pemeri rambau atur pengerami sehari nya Komiti Pemansang enggau Pengelikun Genturung Pendiau (JKKK) enggau Biro Indu ti nerima RM10,000 enggau RM5,000.

Lebuh bejaku ba mua mayuh, iya bisi nyebut pasal pangku pengawa enggau kerejasama bala ketuai perintah besai begulai enggau bala ketuai raban bansa ti nyadi jematan rayat renggat baruh.

Ku iya, pekara tu beguna amat nentuka pengawa pemansang ulih dirumban sereta lanchar pulaika pemaik semua.

KE PENGINGAT… Jugah Muyang (tengah) disempulang peranak Rumah Minggat Mujan, Skrang ditu lebuh ngabas taba ngentak baru rumah panjai sida.

“Bala ketuai raban bansa nitihka pematut nyadi mata enggau pending perintah, mantaika semua sebana, peminta enggau peneka rayat renggat baruh.

“Bala kita ti udah dipadu gawa mega patut ngerembaika penerang pasal polisi perintah ngambika serap genturung pendiau nerima berita enggau penerang ti betul,” ku iya madah nyemetak.

Kebuah pia ku iya laban udah nyadi tanggungpengawa bala ketuai raban bansa nentuka isu enggau pengelantang rayat diintu meruan nyengkaum mantu perintah ngetanka penyerakup ti dikemeran diatu.

“Sida tu patut nipakka pejalai polisi perintah sereta meretika pekara ti nyadi kemaya hari nentuka genap langgur enggau perambu perintah nerima kerejasama semua piak,” tandu iya.

Perintah Pakatan Harapan (PH) semampai meri servis pemadu manah mantu ngangkatka tikas idup rayat nengah sebarang pengawa ti patut.

“Kitai dekaka semua projek pemansang dipejalaika Perintah Besai ungkup rayat meri pangka sereta ulih ngangkatka tikas idup sida ba semua sukut,” ku iya nerang silik.

Ba lansa bukai ku Jugah, Gawai Dayak ukai semina hari besai tang nyadi pelasar ngeneguhka tanggam kaul pupu raban bansa di menua tu.

“Hari besai baka tu nyadi sebagi ari pelasar kitai ngayanka ulah bebatak asur sereta bebasaka pangan diri.

“Kitai mega ulih begulai, begempuru ngerami Gawai Dayak enggau nadai ngira batang pengawa, tikas pelajar tauka penemu politik.

“Peluang baka tu ulih dikena kitai mansutka randau, besilih penemu sereta mendingka sebana rayat, nama penusah ditapi sida, nama bagi peminta enggau peneka sida,” ku iya nyimpul jaku.

RICHAH… Penatai Jugah Muyang disambut peranak rumah panjai ngena adat basa beserimbai enggau Pengerami Mantar Gawai Rumah Minggat Jampi, Mujan Skrang.