50 Peratus Chukai Dagang Temuai

KUCHING: Perintah Sarawak berasai lantang nerima 50 peratus chukai dagang temuai ari Perintah Besai.

Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah madahka chukai tu udah dipejalai kenyau ari jeman perintah besai agi dipegai Barisan Nasional (BN).

“Penerang dipansutka Menteri Besai Tun Dr. Mahathir Mohamad kemari semina nandu pengawa ke patut.

“Chukai tu diambi ari hotel enggau bala temuai ke datai kitu lalu dipulaika baru ngagai nengeri,” ku iya lebuh dirandau di 11 Ridgeway ditu, kemari.

Nangkan nya ku Abdul Karim, iya meri terima kasih ngagai Perintah Besai laban nampung pengawa mulaika chukai dagang temuai ti udah setaun setengah dipejalai.

“Kandang setaun ti udah, kitai mujur nerima bayar chukai nyauka manggai RM3 juta.

“Lalu taun tu kitai ngandal deka nerima mayuh agi,” ku iya nandu.

Apin lama ke udah, Kaunsil Pekara Wang Menua ngemendarka pengawa meri Chukai Dagang Temuai ti nyadi sebagi ari pemeri ngagai Perintah Nengeri berengkah ari taun tu, 50 peratus asil diambi ari chukai dagang temuai genap nengeri.

Menteri Besai, Tun Dr. Mahathir Mohammad ti mega kaban kaunsil nya madah, tu dikena mantu Perintah Nengeri ngemansang sereta nyendia penyikap perengka guna dagang temuai sereta ngelakuka palan dagang temuai seraya matak enggau nambah penyampau tubuh temuai datai nemuai kia.

NERANG… Abdul Karim lebuh nyaut tanya sereta nerang pasal chukai dagang temuai ngagai pengarang berita ditu, kemari.