KANOWIT: Program Randau Begulai Enggau Ketuai mujur diatur peranak Rumah Henry Ajol, Tanjung Pungkong, Sungai Machan, apin lama ke udah.

Penatai Kaban Kaunsil Nengeri (Adun) Machan Allan Siden Gramong ke nyadi temuai dipebasa rambau atur program disambut ngena adat basa.

Sama bisi nyempulang Allan iya nya Ex-Adun Machan Datuk Gramong Juna, ngerichahka agi Program Randau tu.

Program tu nyadi pelasar bala ketuai ngepunka randau begulai enggau raban renggat baruh, mending sereta beratika peminta sida seraya ngiga jalai mutarka penanggul ditapi peranak menua nya.

Tu mega peluang peranak rumah panjai diau semak pengari rayat sida sereta ngedutka tanggam kaul begulai bebaik enggau pangan diri.

Berebak enggau program nya, Allan mega udah ngagihka geran Projek Mit Pemansang Menua Pesisir (MRP) dikena ngaga jelatung.

Kebuah pia laban jelatung ke lama enda likun agi ditengah nentuka pengelikun peranak dijaga sereta seruran dikemerat setipak enggau juluk perintah menua beratka pengelantang rayat.

Iya mega minta peranak menua nya besaup nyeleti jelatung pengudah geran tu dikemendar.

Program sehari nya tembu enggau pengawa nyuaka setipikit chiri ngagai Tuai Rumah Henry ke dipadu mangku pengawa nyilih niang Tuai Rumah Berangka.

SELAMPAI KENANG… Henry (lima kanan) nyuaka tepa ngagai Allan