KUCHING: Rainforest World Music Festival (RWMF) 2019 disadang matak lebih 9,000 iku temuai.

Menteri Dagang Temuai, Seni, Main Asal, Nembik enggau Lumba Dtuk Abdul Karim Rahman Hamzah madah, ba taun 2018, temuai ke bisi ngulu pengerami nya lebih 22,000 lalu 40 peratus (9,000) temuai ari menua luar.

“Aku pechaya pengerami tu deka nyapai tagit nipakka Kimpin Nemuai Ke Sarawak (VSC) benung chakah dipejalai ti berambaika jaku Main Asal, Bejalai, Rampa Menua, Pemakai enggau Pengerami (CANFF).

“Tu mega pekara beguna amat ba pengawa kitai ngangkatka Sarawak ngagai tikas entarabansa ari sukut CANFF, ngambika sida nemu kitai ukai semina bisi pemerindang tang macham pengerami ti ngerinduka ati,” ku iya.

Iya mansutka jaku nya rambau aum pengarang berita RWMF2019 di 11 Ridgeway ditu, ensanus.

ANDAL… Karim nyaut tanya pengarang berita pasal RWMF2019 ditu, ensanus.

Nangkan nya ku iya, RWMF tu udah dikelala ba renggat entarabansa nyadi sebengkah pengerami Muzik Dunya ti ngangkat Sarawak nyadi palan dagang temuai sereta ditapat genap temuai ti angkunka pemerindang.

Ku Abdul Karim, RWMF disadang ulih matak penatai bala temuai kelebih agi ari menua luar sereta ngemayuhka agi pengawa ngelakuka dagang temuai menua.

RWMF 2019 ke-22 tu deka diatur tiga hari berunggu berengkah ari 12 ngagai 14 Julai tu.

Pia mega ku Abdul Karim, pengerami tu deka seruran dikemansang lalu seni main asal diangkat ngagai tikas entarabansa.

“Aku pechaya nengah muzik enggau pengerami main asal ulih ngangkatka Sarawak ba mata dunya lalu bala temuai mega gagit datai kitu meda pengelain enggau penyelai budaya kitai.

“Perintah Sarawak mega seruran meri sukung enggau kerejasama ba pengawa ngatur RWMF tu,” ku iya.

Kelimpah ari nya, chara bebayar nengah aplikasyen SarawakPay mega ngemuntangka bala temuai ti deka meli tikit online nyengkaum palan bedaja pemakai enggau kraf.

“Kami ngarap ari sistem tu, bala temuai deka berasai lantang ari servis ke bisi disedia kitai ditu.

“Sida mega deka bulih penguntung ari bekenaka aplikasyen SarawakPay tu ke alai nyentuk 15 peratus duit deka dipulai,” ku Abdul Karim nerang.

Rega tiket renggat keterubah RWMF2019 iya nya RM125 (pas sehari) lalu RM315 (pas tiga hari).

Barang sapa ti deka nemu enggau silik tau ngelawa website rwmf.net tauka telefon ngagai Kaunsil Dagang Temuai (STB) ba lumbur 082-423600, tauka emel ngagai stb@sarawaktourism.com sereta ulih niki ngagai opis sida ba Ringkat 4, Plaza Aurora, Jalai McDougall ditu.