LUBOK ANTU: Rayat nadai ngira penemu politik dipinta seati enggau sepenemu nyingkang nuju pemansang menua.

Ku Kaban Parlimen Lubok Antu Jugah Muyang, tu nentuka sitak menua dipegai iya ulih ngemansutka diri ari statistik sepuluh pelilih menua pemadu seranta di Malaysia.

“Genap bansa patut nerenakka ulah bebatak asur, bebasa sereta meretika adat enggau gaya idup pangan diri laban nya ti nyadi tiang pemun pengelikun pupu bansa di menua tu.

“Pengelikun bisi diasai diatu patut ditan laban genap bansa di menua tu diberi hak sebela seagi kitai digelar rayat Malaysia, kelebih agi Sarawak,” ku iya.

Jugah mansutka jaku nya rambau Program Merarau diatur komiti Gerija St Michael Kaong Ulu ditu, ensana.

SELAMAT DATAI… Penatai Jugah disambut bala mayuh rambau pengerami merarau Gerija St Michael Kaong Ulu ditu.

Nangkan nya, iya madahka genap rayat endang patut ngasaika asil pemansang kelebih agi sitak Lubok Antu.

“Tu enda ngira pemansang ari sukut infrastruktur rumah sembiang baka gerija, kuil, tepikong tauka masjid.

“Genap rayat sitak tu patut ngasaika pemansang di baruh Perintah Pakatan Harapan (PH) lalu aku nyadi pengari perintah besai naka ulih nguji nangkup peminta bepelasarka belanja ti udah diagih perintah besai,” ku iya madah nyemetak.

Lebuh bejaku ba mua mayuh, Jugah madahka diri keran deka mantu nirika gerija ba sitak nya.

“Pengarap ngembing ulah kitai anang putus pengarap, pengarap mega ngajar kitai angkunka pemanah kaul begulai bebaik enggau pangan diri sereta ngasika ajar Tuhan.

“Taja pelilih Lubok Antu ngelama tu ngasaika ‘pemetang’, tang kitai patut angkat ngambika bulih ‘penampak’ ba idup baru nengah penegap pengerap enggau pemansang deka datai ulih mantu nyungkak tikas pengidup rayat,” ku iya.

Beserimbai enggau program nya, Jugah udah meri geran penyampau RM20,000 ngagai Gereja St Michael.

Iya mega ngarapka agih belanja nya umbas dikena bejalaika pengawa ngemansangka gerija sereta program bukai dia.

TEPA… Jugah nerima tepa ari siku komiti Gerija St Michael Kaong Ulu