MIRI: Bala temuai ti datai besembiang tauka ngulu pengawa bukai diatur ba gerija Sidang Injil Borneo (SIB) Jaku Kayan Taman Tunku deka bisi parking kerita ti meruan enggau besai agi udah tu.

Projek dipelanja Perintah Sarawak nengah Kaban Kunsil Nengeri (Adun) Telang Usan Dennis Ngau.

Dennis ngarap pengawa nangkir paking kerita deka mantu mutarka penanggul paking sekut maya hari sembiang tauka hari bukai.

Iya mansutka jaku tu beserimbai enggau pengawa nyerahka chek diatur ba Palan Servis Komuniti apin lama ke udah.

Ku Dennis, rayat sebanaka penanggul ditapi sida kenyau ari gerija baru berengkah dikena dalam bulan Oktober 2017.

PEMANSANG… Dennis (tiga kiba) nyuaka cek MRP ngagai pengari gerija Tuai Sembiang Wan Ngau Lah lalu seraya dikemata bala bukai.

“Lebuh ngulu misa enggau pengawa bukai diatur gerija, aku berati paking kerita sekut amat kelebih agi gerija didiri semak enggau genturung industri,” ku Dennis.

Ku Dennis, sekeda ari agih belanja Projek Mit Pemansang Menua Pesisir (MRP) endang dikena nyaup pengawa ngemanah rumah pengarap baka gerija, masjid enggau tepikong sereta nyukung atur program dipejalai sida.

“Tu nunjukka ketuai enggau perintah ti megai kitai seruran nyukung sereta nyaga gempung pengarap di menua tu,” ku iya madah.

Chek MRP ti beungkus RM45,000 udah disua ngagai Tuai Sembiang Wan Ngau Lah.

Nitih ku penerang ari Tukang Wang Gerija, Anyir Ajeng, belanja dikena nangkir gerija besai agi ukai semina datai ari pemeri kaban gerija ti udah rejista, tang mega nerima sukung ari Indu Opis SIB nengah bantu belanjau ari Unit Pengarap Bukai (UNIFOR) Sarawak.

Tuai Sembiang Wan Ngau ngarika gerija meri terima kasih ngagai Dennis ti udah gerah jari sereta meri sukung ba pengawa ngemansangka gerija.

Tebal agi kaban SIB Jaku Kayan Taman Tunku Miri tu endang bansa Kayan lalu sida semina meretika Jaku Kayan ari menua Baram enggau Belaga aja.