Jugah: Perintah Besai enda bechiping megai rayat

LUBOK ANTU: Perintah besai semampai beratika penanggul enggau peminta pemansang rayat nyengkaum di rumah panjai.

Kaban Parlimen Lubok Antu Jugah Muyang madah, pengeransing perintah nya bepun ari pengeran numbuhka pemansang ti mungkur semua rayat.

“Perintah besai enggai meda rayat kelebih agi sida ke diau di rumah panjai tinggal pemansang.

“Nya kebuah perintah naka ulih ngemujurka pejalai pemansang ngagai serap menua nentuka rayat nadai tinggal, badu dikelaung,” ku iya madah nyemetak.

Iya mansutka jaku tu lebuh ngulu Pengerami Pemesai Begulai enggu Rayat di Rumah Sunok Teliting, Lubok Antu, empai lama ke udah.

RAJIN NGABAS RAYAT… Jugah (kanan) lebuh datai ba peniki Rumah Sunok di Lubok Antu, empai lama.

Ku Jugah, perintah besai enda bechiping megai rayat menua tu.

“Pemansang ke diberi perintah endang diungkup pulaika pemaik enggau pengelantang semua rayat kelebih agi rayat menua pesisir,” ku iya nampung.

Ngelansa pasal pengawa iya ti suah ngatur pejalai ngabas rumah panjai, ku Jugah, awak tu dikena iya ngelaluka semua ketuai raban bansa di Parlimen Lubok Antu besilih enggau bekunsika langgur penemu begulai enggau pangan diri dikena nyidi penanggul enggau penusah ke ditapi nembiak redak dia.

Iya madah, kaul pemesai perintah nyengkaum kerejasama rata enggau sukung ari ketuai raban bansa nyadika jematan rayat enggau perintah.

Kaul ke manah entara kedua piak ngemai reti besai nentuka pemansang bejalai lanchar enggau nadai bepenanggul sereta penekul.

“Endang tanggungpengawa ketuai raban bansa nentuka isu enggau pengelantang rayat dijaga enggau manah nyengkaum nyaup perintah ngetanka penyerakup ke bisi diatu.

“Kitai dekaka semua rayat sitak Parlimen Lubok Antu nadai ngira penemu politik besaup enggau pangan diri nyapai tuju kitai ngangkatka menua tu mansang agi,” ku iya madah.

Pengerami sehari nya digulu enda kurang ari 250 iku ngayanka sida randaka pemansang lalu Jugah sedarka pekara nya.

“Aku naka alah gawa ke rayat ti mega dikena nimbal pengarap sida ngagai aku,” ku iya nandu.

Berebak enggau nya, iya ngungkupka geran RM50,000 enggau 20 iti kipas ngagai Rumah Sunok.

Kelimpah ari nya, iya mega ngungkupka RM10,000 ngagai semilan buah rumah panjai ti besemak enggau Rumah Sunok.

Bela datai Pemesai Opis Pelajar Lubok Antu Jim Andrew Janggi, Pemesai Opis Bomba Gemong Batu sereta semilan iku tuai rumah ke bukai.

KENANG RAYAT… Mensia mayuh enda muai awak begambar enggau Jugah.

 

NYINUK… Sekeda ari bala ke bisi datai jenuh duduk di ruai mendingka tibar jaku peransang ari Jugah.

 

SEMAK ENGGAU RAYAT… Peranak rumah panjai berandau enggau Jugah rambau atur pengerami nya.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak