Projek Yayasan Sarawak: Rayat sebana jalai kelalu lama ditutup

KUCHING: Mayuh sebana ari mensia mayuh bepun ari projek ngemanahka begunan Yayasan Sarawak sereta pengawa nutup setengan ari Jalai Masjid, ditu.

Kaban Kaunsil Nengeri (Adun) Pending, Violet Yong Wui Wui madah iya dipadahka mensia mayuh Jalai Masjid udah ditutup lebih ari enam bulan tang lalu nadai bisi pemansang dipejalai bekaul enggau jalai nya.

“Kami nerima timbal ari mensia mayuh, jalai tu udah lama ditutup lebih ari enam bulan, tang nadai notis tumu diberi bekaul enggau pengawa nutup jalai tu.

“Jalai Masjid tu ditutup ketegal ari projek ngemanahka begunan Yayasan Sarawak (YS) tu, lalu diatu aku deka nemu bisi ke nadai pemendar ngagai sida ke bempu projek nutup setengah ari jalai tu?” ku iya.

Violet madah munyi nya rambau pengarang berita ba depan Klinik Pengerai Jalai Masjid ditu, kemari.

BEJAKU… Violet bejaku ngagai raban pemberita ba mua Klinik Pengerai Jalai Masjid ditu, kemari.

Nangkanka nya, ku iya, Jalai Masjid tu nyadi jalai perengka pengangkut ti pansut ari palan ngengkah kerita Saujana sereta bisi pejalai kaki ba tisi jalai nya.

“Sida ke deka ngagai jalai sepiak nyau ngelaung nengah jalai klinik pengerai depan tu lalu papan tanda madahka pengawa ngaga jalai benung dipejalaika ba ditu,” ku iya.

“Enti kitai meda, nyelai bendar laban setengan ari jalai tu, iya nya semina jalai sepiak begunan Yayasan Sarawak tu aja ditutup,” ku iya.

Ku Violet, iya deka nemu sapa ti meri pemendar nutup setengah ari Jalai Masjid, lalu bisi ke nadai pelin begunan dianjung ngagai piak ejensi ke bekaul enggau pekara tu ngemendarka jalai nya ditutup.

“Pia mega, enti kitai berati bendar, jalai mua Yayasan Sarawak tunga ngagai Padang Merdeka kin, nama kebuah sida nukar iya kitu lalu ngena setengan ari Jalai Masjid dikena ngaga opis baru?

“Bisi tauka enda duit pampas diberi ngagai perintah nengeri ketegal ngambi mimit ari jalai nya? Projek tu dipejalai nitihka atur undang-undang tauka enda?,” ku iya nanya.

“Aku empu deka nanya kediri ngagai Kaunsil Mengeri Kuching Utara (DBKU) bekaul enggau endur tu enti sema bisi pelin begunan udah diberi ngambika dikemendar digaga bala konteraktor projek tu.

“Tajapan Yayasan Sarawak tu siti ari ejensi perintah, tang enti ngaga nama-nama projek ngemanah, sida endang patut nitihka atur undang-undang,” ku iya.

Pia mega, ku Violet, iya deka meri awak alai sida kausil tauka piak penerit perambu nengeri (SPA) nyaut tanya nya lalu iya madahka diri deka niki ngagai opis DBKU minggu baru nanya sentang pekara tu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak