KGBS chukup sinu beratika penusah ke ditapi bala pengajar enggau nembiak ba sekula nya

“Aku ngarapka agih bantu nyeruri infrastruktur begunan sekula ti udah jai laban ai bah ulih digaga enggau lengkas tauka ngiga jalai alternatif endur nembiak sekula ti deka berengkah enda lama agi.”

KUCHING: Agih bantu ti diberi ngagai peranak Kampung Long Busang ti dituntung penusah bah apin lama dikearap meri fokus dulu ngagai infrastruktur Sekula Primari (SK) Long Busang.

Presiden Gerempung Pengajar Bumiputra Sarawak (KGBS) Ahmad Malie madah iya sinu beratika penusah ti di tapi peranak menua nya rambau ngintu pengerami Hari Raya enggau Hari Gawai kelebih agi ngagai pengajar enggau nembiak sekula kampung nya.

“Aku ngarapka agih bantu nyeruri infrastruktur begunan sekula ti udah jai laban ai bah ulih digaga enggau lengkas tauka ngiga jalai alternatif endur nembiak sekula ti deka berengkah enda lama agi.

“Ketegal penusah nya endang mayuh perengka sekula jai laban maya nya nembiak enggau pengajar nadai diau dia,” ku iya.

Ahmad madahka pekara tu rambau ngintu Pengerami Ngelalu Pengabang Hari Raya Aidilfitri ba rumah iya empu di Jalai Lilin ditu, kemari.

KENANG HARI RAYA…Presiden Gerempung Pengajar Bumiputra Sarawak (KGBS) Ahmad Malie (lima kanan baris kedua) enggau bini iya Fatimah Lee (enam kanan baris kedua) begambar kenang enggau bala pengabang ti bisi datai.

Kelimpah ari nya, iya mega meri pengaga ati ngagai perintah Sarawak Kaban Parlimen Hulu Rajang Datuk Wilson Ugak Kumbong enggau Adun Belaga Liwan Lagang ti udah meri bantu beungkus RM100,000.

“Terima kasih ngagai perintah Sarawak ti udah mantu RM50,000 disuaka nengah Kaban Parlimen Hulu Rajang Datuk Wilson Ugak Kumbong meri bantu RM20,000 enggau Adun Belaga Liwan Lagang meri bantu RM30,000 ngagai peranak Kampung Long Busang Hari Tiga tu tadi.

“Ngarapka bantu tu ulih ngelempungka penusah ti di tapi sida rambau musim pengerami,” ku iya.

Kampung Long Busang dituntung penusah bah sedalam dua ngagai lima meter ketegal ujan bangat kenyau malam Hari Satu nyin kemari.

Entara palan ti balat jai empas ari penusah nya begunan SK Long Busang ti ditenggelam ai nyentuk perabung.

Nangkan ke nya, Ahmad enggau gaga ati nerima pengabang ti datai ngagai rumah iya sereta ngarapka kaul ti seruran manah enggau bala kaban.

Entara pemakai ti dibantai ba rumah iya baka laksa Sarawak, lemang, kek lapis enggau kebukai.

Pengerami nya digulu kaban belayan, bakih sereta mensia mayuh.