KUCHING: Pengerindu beranyam tikai ngujungka pengawa nya meri penatai pemisi ngagai siku indai tunggal Evelyn Lim, 57 taun.

Beasal ari Kampung Beliung, Sebuyau indu penakan Iban China tu madah kenyau mit suba iya rindu nganyam tikai.

“Kelia lebuh agi mit aku belajar ngiga lambar utai ke dianyam ke tikai bepun ari bemban, udah nya ngelimu (ngambi kulit bemban), ngelit (ngaluska kulit bemban) baru nganyam iya ke tikai.

“Proses tu mar laban meseti nganti kulit bemban rangkai baru tau dianyam, ngujungka mayuh orang ngambi jalai puntang meli terus tikai getah ba pasar,” ku iya.

Iya nusi lebuh diau ba mengeri ngulihka bemban chukup tusah tang pengerindu nganyam tikai tu enda tau puntan ngapa.

Evelyn Lim

“Maya bebakih ba gerija aku meda bisi orang nganyam tikai plastik lalu aku berunding deka nguji.

“Aku merati ke gaya tikai ke digaga orang baru aku empu nguji meli dua gulung tali plastik nitih chura ti sebaka beungkus RM60 segulung,” ku iya.

Ku iya, pun nganyam tikai plastik tu iya nganyam betapih (senang digaga) aja udah makin lama baru iya ngayam tikai bebuah.

“Bepun nya aku ngelangkar mayuh macham buah tikai ke manah sereta berurun enggau chura.

“Bala kaban mupuk ngoder tikai plastik tu ari aku nya lalu nya nambahka penatai pemisi taja diau ba rumah tambah mega aku indai tunggal,” ku iya.

ANYAM BUAH…Tikai plastik buah ti digaga Evelyn narit ati.

Tikai plastik tu dijual nitih pemesai berengkah ari RM300 nyentuk RM800. Nyema bisi peminta ari mensia mayuh ngasuh iya nganyam besai agi rega tikai nya manggai RM1,000.

“Bisi dua chara ngayam tikai plastik tu, siti chara ti senang betapih aja enda mar rega, tang chara nganyam adat lama (baka chara ngayam tikai bemban bebuah) tusah mimit ngaga laban proses ngayam enda sebaka tu mbar rega.

“Tambah mega rega tali plastik tu mbar lalu meseti dibeli dua gulung, pia mega nganyam tikai tu enti mit manggai tiga minggu enti besai manggai sebulan timpuh baru tembu,” ku iya.

Kelimpah nya, iya nerang madan ke chura tikai amat beguna laban nya ti ngasuh tikai nya manah sereta narit ati.

“Tang baka aku nganyam ngelama tu nitih ke peminta mega laban kadang-kadang sida ke ngoder madah ni bagi chura kedeka sida nyadi aku nitih aja.

Evelyn mantai ke tikai plastik ti digaga iya ngagai Suara Sarawak.

“Pemar ti ditapi aku diatu endang rega tali ti mar enggau aku enda nemu ngelakuka tikai plastik tu laban nadai nemu facebook baka orang bukai,” ku iya.

Udah nya, iya ngarapka ulih terus mujur dalam pengawa dagang tu sereta bepengerai belama ngambika ulih ngaga pengelandik jari tu dudi ari.

“Aku ngarapka nembiak rebak baru kelebih agi kitai Iban anang enda belajar ke pengelandik jari baka tu taja mayuh ga tikai getah ba pasar ke manah agi tang adai salah belajar,” ku iya.

BEREGA….Evelyn madah tikai chura tu dijual iya ngena rega RM800.