BELAGA: Sepenyampau 340 iku ari 82 ruang bilik di Long Busang ti tasah bah kenyau ari Hari Dua nyin tadi udah nerima bantu penyampau RM50,000 ari Perintah Sarawak.

Pengawa nyuaka bantu penusah ngenyit udah diatur Kaban Parlimen (MP) Hulu Rajang Datuk Wilson Ugak Kumbong.

Ugak ngagihka belanja penyampau RM20,000 seraya RM30,000 agi ari Kaban Kunsil Nengeri (Adun) Belaga Datuk Liwan Lagang ba sebengkah pengawa diatur di Rumah Besar Long Busang.

Raban nganjung bantu diketuaika Ugak disempulang bala pengari ari Opis Pelilih Bukit Mabong enggau ejensi bekaul udah datai di Long Busang urung pukul 5.40 lemai, ensanus.

Ari gaya perati enggau penerang peranak dia, tikas peninggi ai sungai niki ngenyit pengudah ujan bangat mangka kandang menua nya kenyau ari malam Hari Satu sebedau ngampuh dua ngagai lima kaki penalam.

Entara genturung balat kena pangka iya nya Sekula Primari (SK) Long Busang ke alai sekeda begunan sekula ampuh dataika perabung.

BANTU… Liwan (bediri, 10 kiba) enggau Ugak (berdiri, enam kanan) begulai nyuaka bantu ngagai peranak tasah bah.