Dulu ari tu siti surat kabar nasional jaku China bisi mantaika ripot berita bekaul enggau ubah kabinet nengeri

INFO

“Sapit Kepala Menteri Tan Sri James Jemut Masing diripotka bisi mansutka buah runding ngambika orang ti betul ulih dipadu ngisi pangku pengawa lepas ubah kabinet nengeri nya ila.”

KUCHING: “Aku enda nemu,” ku saut Kepala Menteri Datuk Patinggi Abang Johari Tun Openg bekaul enggau berita pasal ubah kabinet nengeri enda lama agi.

Iya mega enggai meri timbal mayuh bekaul enggau pekara nya, taja senaya pekara iya udah dipantaika sekeda pemesai dalam kabinet nengeri sereta bisi diripotka dalam siti surat kabar nasional jaku China.

“Baka ni aku deka nerangka pekara tu. Aku empu enda nemu. Tanya ngagai sida iya empu.

“Anang nanya nama kebuah Kepala Menteri tau enda nemu, laban aku empu sigi enda nemu,” ku iya.

Iya madah munyi nya pengudah iya enggau bini iya Datin Patinggi Juma’ani Tuanku Bujang ngulu Pengerami Ngelaluka Pengabang Hari Raya Aidilfitri Sapit Sekretari Perintah Nengeri Datuk Mohammad Abu Bakar Marzuki di Kampung Siol Kandis, Petra Jaya, kemari.

Sama bisi datai Sapit Kepala Menteri Datuk Amar Douglas Uggah Embas.

Sapit Kepala Menteri Tan Sri James Jemut Masing diripotka bisi mansutka buah runding ngambika orang ti betul ulih dipadu ngisi pangku pengawa lepas ubah kabinet nengeri nya ila.

Ku iya, tu beduduk ari Gabungan Parti Sarawak (GPS) bisi nyimpan ‘munsuh’ dalam parti nya tang nadai madahka enggau nyemetak.

Berebak enggau nya, Menteri Kaunsil Kandang Menua Datuk Dr Sim Kui Hian mega nunjukka ubah kabinet nengeri dijangka deka digaga.

Lebuh dirandau raban pemberita lebuh Pengerami Ngelaluka Pengabang Hari Raya Aidilfitri Kepala Menteri ba Palan Aum Borneo Kuching (BCCK), iya madahka Abang Johari deka mantaika ‘pekara besai’ pengudah Hari Raya tu ila.