BAU: Pengerami Tribal Borneo mantaika penyelai dikembuan bansa asal ti nguan menua nya enggau pemanah rampa menua dia.

Nitih ku Menteri Utiliti Datuk Seri Stephen Rundi Utom, Pengerami Tribal Borneo nyadi sebengkah pengerami ti nyelai diatur dalam kampung dikena nerenak ulah angkunka rampa menua asal.

Ku Rundi, Kampung Tribal Borneo (BTV) nyadi palan ti patut ditapat sida ti rindu nyerungkai gaya idup enggau pemanah rampa menua asal.

Pia mega ku Rundi, mayuh pengawa ulih dikereja di laman genturung pendiau nya baka main lama, main asal enggau ke bukai.

“Aku meri tabi puji enggau pengaga ati ngagai Datuk Peter Nansian ti nyadi penyanding penemu ngagai Pengerami Tribal Borneo tu.

“Tibak penemu iya mega mujur matak mayuh temuai kitu ti deka sereta gagit ngasaika gaya idup enggau rampa menua ditu,” ku Rundi.

Iya mansutka jaku tu lebuh bejadika Pengerami Tribal Borneo di Kampung Apar, Bau kemari.

Berebak enggau nya ku Rundi, opis menteri iya mega deka nambah sereta nyeleti penyikap perengka guna pemun baka bekal ai enggau kuasa karan kandang ngelingi BTV.

Rundi mega bisi meri geran sepenyampau RM30,000 ungkup pengawa pemansang enggau dagang temuai di genturung pendiau nya.

Sama datai Kaban Kunsil Nengeri (Adun) Tasik Biru Datuk Henry Harry Jinep, Datuk Ik Pahon, Tan Sri Wilson Baya Bandot, Adun Layar Gerald Rentap Jabu, Adun Bukit Semuja John Ilus enggau Adun Batu Kitang Lo Khere Chiang.

KE PENGINGAT… Dr Peter Nansian nyuaka ‘kasah’ tauka tikai ngagai Datuk Seri Stephen Rundi Utom nyadika tepa ngambika bisi dikenang dudi hari.