“Orang ti bisi ngembuan niat enda manah seruran deka bejai sereta ngamahka nama GPS, nya pengawa ke enda patut.”

KUCHING: Mensia mayuh dilalau ngambika anang mudah pechaya berita ti nguji bejai Gabungan Parti Sarawak (GPS).

Kaban Parlimen Kapit, Datuk Alexander Nanta Linggi madah ulah nyadung berita bejai GPS ba media rama siti pengawa ti enda manah.

“Orang ti bisi ngembuan niat enda manah seruran deka bejai sereta ngamahka nama GPS, nya pengawa ke enda patut.

“Tu siti chara dikena ‘sida’ beambi ulih ngiga sukung politik enggau pekara ti enda betul,” ku iya.

Alexander madah munyi nya rambau dirandau pemberita pengudah pengerami Ngelaluka Pengabang diatur Kaban Kaunsil Nengeri (Adun) Tanjung Datu, Datuk Amar Datin Patinggi Jamilah Anu ba rumah iya di Santubong ditu, ensana.

PANSIK SILIK… Alexander nerang ngagai pemberita bekaul sebengkah berita ti enda betul dikerembai ba media rama, kemari.

Berebak enggau nya, iya mega nyaut tanya bekaul enggau siku orang ti nuduh nengah siti gambar ba Facebook enggau Whatsapp ti mandangka mensia mayuh pulai Gawai nengah jalai luchak lalu madahka nya nyadi di menua Kapit.

“Aku udah meda gambar nya, lalu nya siti ari penanggul jalai di menua Papua New Guinea, ukai di menua Kapit.

“Orang ke ‘viral’ gambar enggau tuduh ti enda patut nya udah ngaku diri empu, lalu iya tu ditemu siku ari orang ti suah ngerembaika berita ba Facebook, madah ke diri nemu semua utai,” ku iya madah ngagai pemberita.

Alexander ngelalau mensia mayuh bela berati dulu lalu mansik lebih agi tiap iku orang ti deka bejai nama perintah.

Ngenang siti pekara ti kala nyadi suba, bisi mega orang nguji deka bejai perintah tu enda beratka pengelantang nembiak sekula ba menua tu.

“Sida tu tadi ditemu ngambi gambar nembiak benung ngelayang sungai, nengah andau ti udah repuk lebuh nurun sekula, lalu madahka nya nyadi ba siti pelilih menua ba Sarawak.

“Tang lebuh dipansik sereta diperati, gari sekula bala nembiak nya ukai sekula ba menua kitai ditu,” ku iya.