BINTULU: Peranak Rumah Daniel Muking, Nanga Annau, Tatau enda lantang meda ulah serikat ladang, Hormat Pasifik ti ngachau Tanah Adat Bansa Asal (NCR) sida.

Kenu ku Tuai Rumah Daniel Muking, tanah NCR nya endang ditampung ari aki ini kenyau ari beratus taun ti udah.

Ku iya, sida serumah udah ngaga ripot polis pasal pengawa ngachau tanah di Opis Polis Pelilih Tatau ngambika atur ti patut ulih dipejalai.

Kandang menua ti benung diperimba sebuah serikat peribit nya kena bungkur tanah NCR rumah panjai sida, ku iya ngelansa.

“Nya kebuah kami ngapil sereta minta semua kereja nanam sawit tauka berimba ba tanah nya ungkup sebarang tuju patut diketu tekala nya.

MANTAIKA SEBANA… Tuai Rumah Daniel (duduk, dua kanan) nerang pasal isu tanah NCR sida dikachau serikat ladang ngagai Datuk Tiong King Sing ( duduk, kanan).

“Tu nyengkaum semua kereban dikena berimba baka lipan mega enda tau enda dibai pansut ari kandang menua nya,” ku iya madah ngagai Suara Sarawak.

Kelimpah ari ripot polis ku iya, sida mega ngemai pekara nya ngagai Opis Pelilih Tatau nyengkaum pengari rayat ti megai sitak nya.

Taja pia, nyentuk diatu nadai sebarang atur dipejalai lalu nyadi peranak asal menua nya, sida bisi hak nagih kandang menua nya nyadi tanah pesaka ditampung ari aki ini sida.

Kebuah pia ku iya, bisi bukti sejarah enggau bekau sereta abi jari ditinggal aki ini ti kala diau mendam di menua nya mengkang dipeda nyentuk sehari tu.

Tuai Rumah Daniel mega ngelansa ari ni pun pengawa serikat ladang ti ngachau tanah NCR sida.

Ku iya, serikat nya berengkah berimbaka tanah NCR sida ba ujung bulan Januari taun tu tadi.

Piak serikat mega ngumbai tanah NCR dibeli ari sekeda orang enggau nadai madah sapa bagi sida nya.

“Lebuh aku betanyaka ngagai bala nembiak redak, kami serumah, nadai siku ngaku ngereja pengawa tu,” ku iya madah nyemetak.

Nya kebuah sida serumah enda kakang ati ngaga siti ripot polis kena 1 Februari tu tadi.

“Sinu sereta pedis ati meda getah ti dikereja kenyau ari taun 2011 ditebang piak serikat enggau nadai sebarang bayar pampas,” ku Tuai Rumah Daniel nampung.

Iya ngarapka ba pechara 18 Jun di Kort Adat Bumiputera, Opis Pelilih Tatau entara peranak asal enggau serikat bekaul deka bepiak ngagai sida.

Seraya Kaban Parlimen Bintulu Datuk Tiong King Sing besemaya deka ngemai pekara nya ngagai Sapit Kepala Menteri Datuk Amar Douglas Uggah Embas pengudah pengerami Gawai Dayak tu dikena ngiha chara mutar.

Berebak enggau nya, iya dekaka ejensi perintah bekaul bejalai gawa ngagai renggat baruh sereta beratika isu ti bisi nyadi.

Iya mega mejah ulah serikat ladang ti ngachau tanah NCR peranak asal lalu ngumbai sida nya kelalu tinggi penemu sereta nadai penyiru.

Nangkan nya, Tiong ngansak serikat ladang ngetuka semua pengawa di tanah NCR peranak rumah panjai nya.