KUCHING: Kaunsil Pemansang Dagang Kayu Ramu Sarawak (Pusaka) nagit nanam sejuta hektar ladang kayu aksia datai ba taun 2025.

Ku Menijar Besai Pusaka Hashim Bojet, naka diatu ejensi sida bisi nanam 420 hektar ladang aksia di selampur Sarawak.

“Kitai enda ulih kelalu bepanggai ngagai pemansut kayu batang ari kampung asal laban majak nadai.

“Kebuah pia laban kitai ngadang pemansut kayu batang ari kampung asal iya nya tiga juta meter padu dalam timpuh lima taun dibanding diatu, enam juta meter padu,” ku iya nerang.

Iya mansutka jaku nya lebuh dirandau Suara Sarawak di opis iya di Wisma Sumber Alam ditu tadi.

Kenu ku Hashim, kayu aksia semampai ulih ditanam enggau ditebang ti begunaka lapan ngagai 12 taun ungkup industri.

“Dibanding enggau kampung asal ti begunaka timpuh manggai 40 taun endur tau ditebang.

“Nya kebuah kitai ngalih ngagai kayu aksia dikena ngenegapka industri kereban rumah di Sarawak pengudah kualiti iya nyata teguh pengudah menua Vietnam ngepunka dagang nya,” ku iya nerang silik.

Enti suba ku iya, kayu aksia semina dikena nyadi input ngagai kilang palpa enggau keretas aja.

“Pengudah kitai ngalih ngagai kayu aksia, pemain industri nerima chara tu enggau manah amat.

“Kebuah pia laban mayuh agi kayu ulih dikemansang nyadi produk ungkup industri mansau enggau besai,” ku iya.

Randau eksklusif begulai enggau Hashim beserimbai enggau Ekspo Industri Kayu Ramu enggau PKS Sarawak keempat deka diatur nengah kerejasama Pusaka enggau Opis Menteri Pemansang Pengawa Industri enggau Dagang kena 27-30 Jun bepalan di Palan Aum Borneo Kuching (BCCK).