SPAOH: Agi tubah pemansang patut dipejalai di kandang menua Spaoh taja mayuh pemansang udah dipejalai dia, ku Sapit Kepala Menteri Datuk Amar Douglas Uggah.

“Dunya dudi hari napi mayuh pemar tang ari sukung enggau kerejasama semua kitai deka nyapai pemujur sereta teputarka pemar nya.

“Kitai diatu beratika baka ni chara mansut enggau nambahka penatai pemisi rayat,” ku iya nampung.

Sida udah ngelala sekeda pengawa betanam betupi dikeandal ulih meri pemaik ngagai semua.

“Selampur Bagi Menua Betong enggau kandang menua ngelingi ti besemak bisi pengulih besai ba pengawa betanam betupi komersial.

UNGKUP PENGELANTANG… Datuk Amar Douglas Uggah nyuaka geran RM100,000 ngagai siku ari pengari genturung pendiau di Spaoh.

“Kitai mega merambu numbuhka padang bilun dikena ngemai produk betanam betupi ti bisi ngagai makit menua luar,” ku iya madah nyemetak.

Pia mega ku iya, Perintah Sarawak udah ngagihka RM100 juta dikena ngaga padang bilun nya.

Uggah ti mega Menteri Betanam Betupi Moden, Tanah Adat enggau Pemansang Kandang Menua madahka model chara betanam betupi moden baka fertigasyen enggau hidroponik deka ditumbuh di kandang menua nya dikena ngelakuka chara nya.

Berindik ari nya, iya ngansak raban pinchin gawa perintah menua tu datai ke mua mantu pengawa ti patut.

Ku iya, sida mega tau ngaul diri nyadi raban penyanding penemu enggau meri langgur runding ngagai rayat renggat baruh kelebih agi ba pengawa meri pemutus enggau ngaul kerejasama rat begulai enggau raban perintah nyengkaum pengawa ngelanggur mayuh agi pemansang.

Iya mansutka jaku nya lebuh nyuaka geran ngagai chairman surau sida rambau pejalai ngabang Hari Raya ngagai genturung pendiau dia.

Ba lansa bukai, sepuluh buah surau ari empat genturung pendiau ditu bela nerima geran sepenyampau RM100,000 ari Perintah Sarawak, ensanus.

Ku iya, tuju geran nya dikena nyeleti enggau ngemanah surau ti bisi di kandang menua nya.

Iya madahka Kepala Menteri Datuk Patinggi Abang Johari Tun Openg mega udah ngemendarka sepenyampau RM500,000 ungkup tuju sama ngagai masjid Spaoh dalam bajet taun baru.

Agih belanja tu ku Uggah nunjukka perintah siruka pengelantang urung 4,000 komuniti muslim ti diau dia.

Iya mega ngansak bala komiti surau bejalaika pangku pengawa sida ngembing ba jalai pengarap enggau nyeridi ulah ti meruan ngagai bala nembiak.

“Kitai deka ngelimpangka raban nembiak ari ngereja ulah enda menuku baka salah guna dadah enggau ngemai motosikal nadai beradat,” ku iya.

Sama datai Kaban Parlimen Betong Datuk Robert Lawson Chuat, Sekretari politik Kepala Menteri Dr. Richard Rapu, Residen Betong Friday Belik enggau sapit iya, Abang Mohammad Abang Trukey sereta Pemesai Pelilih Betong Sofhi Jebal.