RNI (Gagung) SDNU Saratok keran ngangkat, ngetan ngepan asal Dayak Iban

ROBAN: Pinchin ari pangku pengawa DSP (B) Bakar Sebau, 65 taun, ngisi awak lepa enggau aktiviti ngetanka pengaya ngepan bujang berani Iban, gagung.

Ngempung Penemu

Kenu ku peranak asal Pasir Empayang di Kabong, pengudah pinchin gawa kena 24 Mei 2014, pangku pengawa kepenudi Ketuai Polis Pelilih Belaga, iya enggau bala bakih bukai suah berandauka pengawa ti patut dikereja sida dikena ngisi jam enggau pengawa ti meri pemaik.

“Pemuas berandau, bala lalu teulihka runding numbuhka kelab ngaul pekayan asal kitai bansa, gagung.

“Tu mega ngempung penemu bala bakih bukai ti tebal agi rindu sereta angkunka pengawa ngetanka penulin ngepan bujang berani.

“Kami sebuat lalu numbuhka Raban Ngepan Iban – RNI (Gagung) SDNU Saratok kena 17 September 2016,” ku Bakar ngelansa pejalai sida.

GAP… DSP (B) Bakar Sebau

Rintai Komiti

Taja pia, iya endang udah dulu chakah ngaul diri ba pengawa ngintu enggau ngiga keresa lama nyengkaum kereban gagung kenyau ari bulan Disember 2014.

Ketegal pengangkun nya ku Bakar, sida sebuat berengkah nyiri komiti ti diembing Penyanding Penemu Jeti Kumpai Ak Datuk Amar Dunstan Endawie, Chairman John Jelema, disaup sapit iya SM (B) James Nyandang.

Seraya Sekretari dipegai DSP (B) Bakar Sebau, Sapit Sekretari Bintara Kanan (B) Spencer Gun, Tukang Wang Manggie Ambin, Sapit Tukang Wang Pegawai Waran II (B) Belin Manjar sereta disaup bala komiti bukai Bennet Buan, Tinggom Bat, enggau Jinud Daeb.

Naka diatu ku Bakar, urung 25 iku kaban udah rejista diri nyengkaum lima iku kaban indu.

PEMANDANG… Pingat tanda basa mega bisi disangkingka iya ba gagung.

Tuju, Juluk Ati

Batang tuju penumbuh RNI (Gagung) SDNU Saratok tu ke satu dikena narit ati bala nembiak rebak baru ngambi bela angkunka ngepan asal kitai Iban.

“Tuju kedua, dikena gempuru maya berami ngena ngepan asal ti ulih ngerapitka agi kaul begulai enggau pangan diri.

“Lalu ketiga, jeman tau berubah tang adat asal kitai bansa enda tau dilengka enggaika adat basa, ngepan lama, main asal kitai majak rapas, majak ayas, ti tau ngujungka iya punas jemah.

“Tuju keempat dikena ngempung bala nembiak kitai ngambi nadai ati sanggu ngaku diri bansa Iban ketegal pemansang dunya.

“Kepenudi iya, kami ngasaika diri menggi tanggungpengawa besai niri negika ngepan asal kitai bansa Dayak Iban, enti ukai kitai, sapa agi dikeandal?” ku Bakar madah nyemetak.

BUJANG BERANI… Berintai ba tengah laman rumah ngelalu pengabang lebuh Mantar Gawai 2019 Rumah Anchang, Sungai Muding, Saratok kena 25 Mei 2019.

Penempa Gagung

Ku Bakar, gagung tu sebengkah baju ti digaga ari kulit jelu siga baka jugam lalu suah dikena kitai bansa Iban kelia maya nurun ngayau mulau menua, ngulu pengerami besai sereta pengawa begawai.

“Gagung enda tau dikena ninting hari tauka dikena orang sengapa laban suba pekayan tu dikena orang ti deka nurun ngayau, orang ti kering, berani sereta tampak nama.

“Nitih ku cherita tuai, bala munsuh takut deka ngelaban enti meda bala Iban bekenaka gagung.

“Enti kelia, sida ti ngembuan gagung tu dikumbai orang berani sereta bisi pengaruh,” ku Bakar ti diatu diau mendam di Rumah Siti Jubidah, Sungai Engkabang Tengah, Roban.

NGELALU PENGABANG… Raban Ngepan Iban (Dagung) SDNU Saratok lebuh ngambat penatai bala temuai dipebasa rambau Mantar Gawai 2019 di SJK Min Syn, Saratok, 18 Mei 2019.

Angkunka Pesaka Asal

Siti ari kebuah raban sida milih gagung nyadi pesaka ti deka diangkat sereta ditan laban penyelai enggau pengalus jari ti nempa ngepan nya.

“Enti dulu menya, lebuh menua agi siga, bala bujang berani ngerasukka gagung nurun ngayau.

“Nya kebuah gagung tu tau dikumbai kitai dinding bulu bala bujang berani lalu tu ngasuh ati kami balat bebasaka ngepan tu,” ku Bakar madah nyemetak.

“Kelimpah ari nya, ngepan tu disempulang enggau taring jani ti berantu, ngembuan pengaruh bebunuh sereta dinding bulu,” ku Bakar nyimpul randau renggat keterubah enggau Suara Sarawak.

MANDING… Pengawa ba Rumah Josephine Entira, Mapar, Krian, Saratok lebuh ngambat penemuai Tan Sri William Mawan Ikom kena 25 Mac 2017.

 

KENANG MANIS… Raban Ngepan Iban (Gagung) SDNU Saratok mega bisi dikangau datai ngulu pengerami melah piang di Rumah Belang, Ensawa, Krian di Saratok kena 2 Jun 2019.