SARIKEI: Pengawa ngaga jalai baru sepemanjai tujuh kilometer (km) deka meri pemaik besai ngagai peranak sitak Kerubong enggau Selalang ungkup timpuh panjai.

Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah, tu nyadi jalai alternatif ngagai sida ti diau ba kandang tebing tasik Kabong, Sessang, Nyabor enggau Gerigat ngelawa Sarikei enggau Sibu kelimpah nengah jalai besai Pan Borneo.

Iya madah, jalai alun tu deka ngemandak jam pejalai sereta meri pemaik ngagai 13 buah rumah panjai dia.

“Jalai alun tu deka ngemuntangka agi pengawa kitai ngagihka belanja sereta nyendiaka perengka guna pemun baka bekal ai enggau kuasa karan ngagai kandang menua nya.

“Jalai alternatif tu beungkus RM50 juta,” ku iya madah rambau atur Pengerami Gawai Raya di Dewan Komuniti Kampung Kerubong, kemari.

KENANG… Penatai Len Talif enggau Yusuf disambut manah bala peranak dalam Program Gawai di Kerubong.

Berebak ari nya ku iya, GPS deka nampung langgur pemansang pulaika pemaik ngagai semua rayat.

Ku iya, inisiatif tu dipejalai ukai semina maya musin pengawa bepilih aja tang deka semampai dipejalai ba sebarang maya.

“Rayat patut nemu inisiatif tu ukai ngaul politik aja tang deka meri pemansang ngagai rayat.

“Kitai ngereja pengawa tu ngambika rayat bisi peluang ngangkatka tikas pengidup sida meruan agi,” ku iya nerang.

Iya ti nyadi Kaban Kaunsil Nengeri (Adun) Kuala Rajang madah, bantu perintah dikena nyeleti infrastruktur ba pulau di tanah seberai Sarikei bisi pengulih besai kelebih agi ba pengawa betanam betupi.

“Pengawa tu baka ngaga ban, nyendiaka perengka pengangkut feri enggau mayuh agi ke bukai.

“Aku bisi amat pengandal menua tu ulih mansutka mayuh asil betanam betupi sereta ulih dieksport ngagai menua luar enti sema disikap ngena perengka ti meruan,” ku iya nerang enggau silik.

Kandang menua nya diuwan pupu bansa nyengkaum raban bansa China (Bukit Huang) bisi 68 buah rumah, Iban (Muara Payang) 128 pintu enggau Melayu – Bugis (Parit Bugis) semilan buah rumah.

Pulau tu mega bisi Sekula Primari (SK) Muara Payang enggau 11 buah rumah panjai seraya lima ari rumah panjai nya kena pegai sitak Kuala Rajang enggau Dun Semop.

Sama datai Kaban Parlimen Tanjung Manis, Yusuf Abd Wahab disempulang bala bukai.