KUCHING: Penerima renggat kedua Bantu Nupi Pengidup (BSH) dipinta ngaga akaun baru Bank Simpanan Nasional (BSN) berengkah ari 25 Mei.

Sebedau tu, penerima BSH ulih ngena akaun ari sebarang bank, sekalika akaun bini tauka laki, tang diatu semina akaun BSN ngena nama bini aja dikemendar.

Suara Sarawak minta penemu mensia mayuh Indu Opis BSN Satok enggau BSN Batu 7 ditu pasal atur baru BSH nya.

Opis BSN didedat mensia mayuh kenyau ari pagi laban bela berumban ngaduka pengawa sida.

Ku Samsiah Sat, 34 taun, BSN pampang Satok tu pampang kedua ti dilawa iya pengudah ngelawa BSN Batu 7.

Mua opis BSN Satok dedat laban mensia mayuh ti deka ngaga akaun BSN baru.

“Aku minta kemisi setengah hari sehari tu (kemari) lalu ukai muntang minta kemisi laban gawa ba opis pengerai.

“Ba aku empu, atur ngena akaun laki nadai nanggul laban bantu nya ungkup belanja ruang bilik.

“Tambah mega, pengiruh kitai ti diau di mengeri ngelawa BSN nyangka enda sebaka enggau sida ti diau jauh di menua pesisir laban deka ngaga akaun baru,” ku iya sebana.

Ku Samsiah, tebal agi sida ti diau di menua pesisir enda nemu sereta meretika ubah ngaga akaun baru tauka ngena akaun bini laban nadai penerang silik dikerembai nengah televisyen, radio enggau surat berita.

“Sida ti diau di menua nadai sambung internet sereta puntan penemu, semina ngandalka diri bulih bantu aja.

“Sinu meda pengiruh apai indai enggau bala di menua ditating belanja besai maya nurun ke pasar,” lansa iya.

Ronney Pengabang, 34 taun, madah udah minta kemisi dua hari laban deka ngadika akaun BSN bini iya.

“Dua hari udah ngaduka akaun bini tang lalu apin teulihka pemujur,” ku iya.

Ku Ronney, opis BSN semampai dedat laban penerima BSH berebut ngaduka akaun sida lalu pekara tu ngasuh iya irau laban nangika diri dibuai kereja ketegal suah minta kemisi.

Nangkan nya, Dimah Guang, 33 taun madah iya datai ari menua pesisir Kampung Tuba Ulu, Simunjan.

“Enda nemu kemaya pengawa ngaga akaun tu tembu.

“Kami duai laki bini datai kemari (ensanus) bemalam ba rumah kaban di Demak din, tumu pagi tadi datai kitu meda mensia mayuh udah bededat,” ku iya.

Dimah madahka seduai melaki bini apin mulaika diri kandang beberapa hari enti pengawa apin teputar laban berundingka penyauh pejalai enggau pekara belanja.

“Tambang pulai mansang manggai RM70 ditambah enggau belanja bukai, nya kebuah kami duai semina mulaika diri enti pengawa udah tembu diadu.

“Agi tubah bala di menua apin nemu sereta ngaga akaun baru nitihka atur baru BSH tu,” ku iya.

Ari tinjau penemu nya, perintah besai patut berundingka pemar enggau penusah ditapi rayat berindik ari atur baru BSH nya.

Rayat mega ngarapka opis bekaul berundingka pengelantang sida nyengkaum ngemuntangka atur ngaga akaun ungkup peranak ti diau di menua pesisir.