KOTA SAMARAHAN: Sekula Primari (SK) Merdang ti baru disadang tembu ujung taun tu.

Kaban Parlimen Kota Samarahan, Rubiah Wang madah, nadai sebarang penanggul enggau penekul ba pengawa ngaga sekula nya naka diatu.

“Pengawa berengkah dipejalai Oktober 2018 lalu enti nadai nanggul, sekula tu tau berengkah dikena taun baru.

“Kami ngarap penanggul enda tetangkupka penyampau tubuh nembiak di menua tu deka teputar pengudah sekula tu tembua,” ku iya andal.

Rubiah mansutka jaku nya lebuh dirandau Suara Sarawak rambau Pengerami Ngelaluka Pengabang ti diatur iya di Dewan Suarah Kota Samarahan ditu, kemari.

Nangkan nya, SK Jalan Muara Tuang diatu sekut amat laban mayuh nembiak ti baru besekula dia.

“Peneras pemansang ngujungka mayuh genturung pendiau baru ditumbuh ditu lalu sekula ke bisi enda tetangkupka penyampau tubuh nembiak ti majak nambah ninting taun.

“Perengka guna pelajar kitai mega enda chukup nangkup pemayuh tubuh nembiak ti besekula,” ku iya madah nyemetak.

Kelimpah ari nya ku Rubiah, SK Pengkalan Kuap diatu benung ditinda sereta ngarapka semua penanggul ngaul sekula sekut teputar jampat.

“Projek ngaga SK Pengkalan Kuap udah dikemendar ba taun 2016 tang ketegal penanggul baka tanah enggau ke bukai, nya kebuah pengawa semina berengkah dipejalai diatu.

“Kitai chukup benasit laban Perintah Besai enda matak pulai agih belanja dikena ngaga sekula tu,” ku iya madahka pengelantang diri.

Urung 700 iku nembiak besekula di SK St Martin Merdang lalu sida diatu benung ngenduh ba sebuah begunan disuwa Opis Pelajar Nengeri Sarawak.

Sama bisi datai Menteri Dagang Temuai, Seni, Main Asal, Nembiak enggau Lumba, Datuk Abdul Karim Hamzah, Kaban Kaunsil Nengeri (Adun) Tanjung Datu, Datuk Amar Datin Patinggi Jamilah Anu enggau Adun Muara Tuang, Datuk Idris Buang.

Mensia mayuh ti bisi datai dinah enggau bemacham pemakai tradisi baka lemang, chandut, Laksa Penang, kek lapis enggau ke bukai.