Tim Projek Pensel

SRI AMAN: Tujuh hari berentak Tim Projek Pensel nangkup kangau ngabang Gawai Dayak di Bagi Menua Sri Aman berengkah ari 31 Mei nyentuk 6 Jun tu tadi.

Ku pemungkal Projek Pensel Norina Umoi Utot, Gawai Dayak deka berasai puang enti enda diintu enggau dirami ngena awak ngabang, ngusung kaban belayan enggau bala bakih bukai.

Kebuah pia ku iya, ngabang tu udah dikemeran raban bansa kitai kenyau ari kelia lalu patut ditan dikena nyaga pemanah tanggam kaul begulai bebaik enggau pangan diri.

“Kitai ngabang nadai ngira bida penemu politik, pemisi pangan diri, asal penatai, bansa enggau pengarap laban tuju kitai semina deka ngerapitka tanggam kaul lalu ukai ngira pengurang.

“Ngabang tu tau dikumbai nyelai laban ngemai reti tauka pesan ti bebatang pasal pemesai guna semengat bebatak asur pulaika peneguh kaul serakup enggau pengelantang pupu bansa ti bisi di menua tu,” ku Norina madah nyemetak.

PERANSANG… Bala nembiak mit nerima pemeri set pensel ari tim Projek Pensel disuaka Norina lebuh nerima kangau ngabang di Rumah Rokiah, Jungkong, Balau, Sri Aman kena 1 Jun.

Ngelansa sekeda pejalai ngabang Tim Projek Pensel nyerumba Gawai Dayak taun tu ku Norina, malam 31 Mei lebuh ngintu malam Gawai nyadi sereta nyeradak ai pengayu di Rumah Augustine Bunto Bakung Ai ditu.

Udah nya kena 1 Jun sida sebuat nampung pejalai ngabang ngagai Rumah Rokiah, Jungkong, Balau di Sri Aman lalu disempulang pengawa nyuaka insentif mata duit ngagai bala nembiak ti mujur bulih pemutus peresa nyulut ba UPSR, PT3 enggau SPM tu tadi.

Tumu pagi 2 Jun, Tim Projek Pensel ngemanjaika singkang nerima kangau ngabang ngagai Rumah Bruen di Banting, Lingga ke alai sida mega udah nyuaka pemeri set pensel ngagai bala nembiak sereta ngenataika licha peransang pelajar nengah lagu baru ditengkebang Projek Pensel empu benama ‘Aram Nulis’.

“Rindu amat meda bala nembiak mit jampat nangkap utai diajar aku kelebih agi nengah pengawa belagu. Semua sida gagit belagu enggau betanda nitihka tiun ti ranchak.

“Pengagit enggau semengat bala nembiak mit tu ngasuh ati aku balat siru sereta sinu ingatka pemar idup ditapi diri lebuh agi mit menya lalu tu nyadika peransang aku ngembing sida dataika mujur enggau nyadi mensia ti menyana jemah,” tandu Norina.

RICHAH… Bala nembiak mit rindang nyadaka lagu ‘Aram Nulis’ nunda ajar Norina.

Udah nya sida sebuat ngabang ngagai Rumah Junid enggau begawai begulai enggau bala kaban Serakup Dayak Sarawak (Pedas) sereta Dayak Bukit Kelingkang (DBK) di Bayai, Sri Aman.

Kelimpah ari nya, Tim Projek Pensel mega bisi ngatur licha peransang ungkup apai indai nembiak nyengkaum sida ti ngulu kelas orang tuai, berengkah pun taun tu tadi.

“Kami bisi nyaup ngena mata duit penyampau RM1,000 ngagai Kelas Orang Tuai di Kampung Melikin, Sungai Gudom, Balai Ringin, ti diketuaika pengajar Korea.

“Besai pengandal aku deka meda semua atur enggau pejalai kelas Jaku English ungkup nembiak mit enggau kelas orang tuai tu mujur nitihka juluk enggau niat gawa ngintu pengelantang raban bansa kelebih agi di kandang menua pesisir,” simpul Norina lebuh dirandau Suara Sarawak.

Siku ari peranak Kampung Melikin Sungai Gudom, Aby Mith, meri besai terima kasih ngagai Tim Projek Pensel ti udah nyaup enggau nyukung pengawa sida semenua ngemansangka pelajar enggau pekara rama bukai.

 

MERAYA… Bala nembiak mit gagit nerima pemeri set pensel ari Norina.

 

BELA AMPIT BELAJAR… Kelas Sekula Tuai di Melikin Sungai Gudom, Balai Ringin, Sri Aman mega bisi nerima pemeri ari Tim Projek Pensel nyerumba Gawai Dayak 2019.

 

REBAK BARU… Rebak nembiak dikeandal Tim Projek Pensel nampung pengawa ngemansangka menua jemah.