PANTU, Sri Aman: Raban PKR Sri Aman bisi limpang nganjung bantu ngagai peranak ti tasah angus rambau kemisi nyerumba Gawai Dayak tu tadi.

Penyelaras PKR Sri Aman Norina Umoi Utot disempulang Chairman PKR Pampang Sri Aman Yen Jebeni sereta bala kaban PKR bukai ngatur pejalai ngabas seraya nganjung bantu ngagai Rumah Annie William di Kampung Semawa Ulu, Pantu ditu kena pagi 6 Jun tu tadi.

Disambut Enggau Ai Mata

Penatai sida sebuat diterima enggau ati sinu peranak rumah panjai nya laban agi tusah ati ngenang penusah ti nuntung sida serumah empat hari sebedau ngintu Gawai Dayak.

“Berasai sinu meda rampa taba rumah semina tinggal tunggul tiang aja, angus lenggis dataika tanah.

SAUP ARI KAMI… Norina disempulang bala bukai nyuaka barang bantu ngagai peranak Rumah Annie William.

“Kitai ti meda tu tau labuh ai mata, enda ibuh sebut sida ti ngesan enggau napi penusah, pandak jaku,” ku Norina ngaum ati lebuh dibai bejalai ngabas taba rumah panjai ti angus.

Keringka Semengat

Ngarika bala bukai, Norina meri jaku peransang ngagai sida Annie serumah ngambika liat ati napi penguji besai tu sereta anang leju besampi ngarap semua penanggul teputar jampat.

“Keringka semengat kita serumah, kami nemu tu penguji besai ba kita lalu ngarap bala kita nerima enggau ati lantang nyangka bisi utai manah agi deka datai.

“Sampi kami meruan enggau kita serumah lalu naka ulih nyaup ngelempungka tating penusah ti diasai bala kita. Nya kebuah kami datai kitu sehari tu.

BEPUPU… Norina ngarika bala bukai nyuaka bantu ngagai Tuai Rumah Annie rambau pejalai nganjung bantu kia apin lama ke udah.

“Deka ngabas, nanyaka rita bala kita ngambika kita ngasaika diri bisi orang ibuh, semampai diketati sereta bela ngasaika pemerinsa kita ti lenyau endur beteduh,” ku Norina nampung.

Bepupu Mantu

Nangkan nya, entara bantu bisi dianjung rambau pejalai nya baka barang pemakai, berau enggau mata duit datai ari pupu sida ti gerah jari besaup.

“Meri besai terima kasih ngagai bala ti udah gerah jari nyaup enggau aku bepupuka anak belanja dikena mantu sida Annie serumah kelebih agi kami sebuat betubuh 16 iku.

“Taja bantu tu nadai mayuh tang tu dikena kami ngayanka penyinu ati sereta sukung kami ngagai kita serumah,” ku iya nerang seraya nambah, sida sebuat mantu enggau lurus ati.

ENDA BELAMPUNG ATI… Barang bantu diangkut sida Norina sebuat ngagai endur peranak Rumah Annie diau ngenduh diatu.

Iya mega ngarapka mayuh agi bala kaban gerempung ukai dikuasa perintah (NGO), ejensi enggau opis perintah bekaul sereta orang ngatika diri bela gerah jari mantu sida ti dituntung penusah karam di darat.

Nyadi Teladan

Berindik ari nya ku Norina, nadai ngira kitai ti ngentak rumah ngembuah tauka betampung, pekara pengelikun patut dikemerat.

Ku iya, tu nyengkaum nyikap diri ngena penemu enggau latih pasal kereban pengerara api sereta chara ngerara api ti betul baka ti suah diajar raban Bomba.

“Kitai tau minta raban Bomba datai ngelawa rumah panjai, ngatur kimpin nagang enggau nyeliah penusah angus sereta nunjukka chara bekenaka perengka pengerara api enggau betul.

ENDA BELAMPUNG ATI… Barang bantu diangkut sida Norina sebuat ngagai endur peranak Rumah Annie diau ngenduh diatu.

“Kitai mega patut bejimat maya besampungka tali karan lalu patut ngasuh orang ti bisi penau ngereja pengawa nya laban tebal agi penusah angus ditemu nyadi ketegal sut tali karan.

“Bala apai indai enggau sida ke tuai mega patut ngelalau bala nembiak anang bemain api kelimpah bejimat enggau anang ilap maya bebela di dapur kelebih agi musin kemarau tu,” ku Norina nibarka jaku lalau.

Lansa Penusah

Ngelansa pasal penusah ti nuntung urung 44 iku ari 12 pintu bilik Rumah Annie William di Kampung Semawa Ulu, Pantu, Sri Aman begawai enggau sinu ati pengudah rumah sida nyadi abu ba penusah angus, 27 Mei tu tadi.

Nitih ku penerang Ketuai Bomba Zon 3, Nik Muhammad Hafiq Nik Roslan, siku lelaki betu lebuh nguji ngerara api seraya api dipelaba bepun ari dapur siti ari bilik di rumah panjai nya.

Sida nerima kangau urung pukul 2.06 lemai lalu ngerah raban sida ngesah ngagai endur penusah nyadi urung 52km penyauh ari Opis Bomba Sri Aman.