BINTULU: Peranak Rumah Linggie Layang di Lot 1, Block 33, Kakus Land District di Tatau ditu minta perinta beratika pekara pengelantang kelebih agi ngaul infrastruktur jalai.

Kenu ku Penyanding Penemu Rumah Linggie, Sang Sanjan, sida serumah udah lama ngasaika pemerinsa betengahka jalai sepanjai 7km ari jalai besai (jalai batang) ngelawa rumah panjai nya.

“Jalai nyauka enda ulih ditengah enti musim pengujan ketegal jalai luchak laban nadai dianchauka kerangan.

“Merinsa amat asai maya pulai ke menua lalu sida ke tuai ti diau mendam di rumah panjai mega napi pemar lebuh mindah ke bukai tauka nurun ngalu ke pasar Tatau,” ku Sang ngelansa.

Nya kebuah iya minta perintah nadai ngira perintah besai tauka perintah nengeri bela berati enggau betatika penusah ditapi sida semenua sereta ngerumban pengawa mutarka penanggul nya.

BERITA MANAH… Tuai Rumah Linggie (empat kiba) nyempulang bala pengari ari JKR Sarawak di Kuching ngabas taba projek jematan besi meraka Sungai Meruyau.

Jalai tu nyambung peranak menua nya ngagai menua luar sereta ngemuntangka pejalai sida mindah.

Enti sebedau tu ku Sang, sida ngili Sungai Kakus enti deka nurun ngalu urung lapan jam pengelama.

“Nya alai kami keran amat sereta dekaka jalai tu diseleti enggau dikemanah nitihka pematut pulaika pengelantang sida. Enda ibuh belakin dulu, chukup enti dianchau kerangan udah nya diseleti berenggat jemah,” ku Sang ngapil.

Ba lansa bukai, Tuai Rumah Linggie mega madahka diri bisi nerima kangau ari Opis Kereja Raya (JKR) Sarawak di Bintulu dientudi enggau penatai dua pengari JKR Sarawak ari Kuching kena 28 Februari 2019 tu tadi.

NYAUKA ENDA ULIH DITENGAH… Gaya jalai sepanjai 7km ngelawa rumah panjai sida Sang serumah.

“Tuju pejalai sida tu nyukat taba projek nirika jematan besi ti meraka Sungai Meruyau.

“Ke diatu, lumpung kayu disengkar ba sungai nya sereta dilamun ngena tanah enggau kerangan ngambika ulih ditengah.

“Tang lumpung kayu nyau majak repuk, mayuh udah runtuh ngujungka iya enda likun ditengah,” ku Tuai Rumah Linggie lebuh dirandau Suara Sarawak.

Ku iya, projek tu datai ari Perintah Sarawak lalu deka meri pengelantang ngagai sida semenua ti nengah jalai nya.

“Kami serumah mega meri terima kasih ngagai Perintah Sarawak nengah Opis Menteri Utiliti enggau Sarawak Energy laban udah ngemujurka projek Stesyen Sistem Solar ti meri bekal kuasa karan 24 jam ngagai kami serumah.

“Besai amat pengandal aku ngambika mayuh agi pemansang deka datai enggau dipejalai di menua tu kelebih agi penyikap perengka guna pemun baka bekal ai beresi enggau sambung jalai ti meruan agi,” ku iya madah nyemetak.

 

NYAUKA ENDA ULIH DITENGAH… Gaya jalai sepanjai 7km ngelawa rumah panjai sida Sang serumah.

 

NYAUKA ENDA ULIH DITENGAH… Gaya jalai sepanjai 7km ngelawa rumah panjai sida Sang serumah.