KUCHING: ‘Sanggal’ tu sebengkah palan khas ti digaga Ketuai Gawai nyadi kelai bebasaka semengat Petara ngambika nyaga penyerakup enggau pengelantang rumah panjai kelebih agi maya pengerami Gawai Dayak.

Kenu ku Misan Satuk 48, Ketuai Gawai ba genturung pendiau di Kampung Benak Puncak Borneo, nerangka Sanggal tu suah dikena maya musim Gawai, lalu ke diatu dikena ngangauka semengat padi pengudah abis musim ngetau padi.

“Ba pengawa nya aku nyadi Ketuai Kaul deka malu tawak ngelingi Sanggal tu nyadika kelai meri terima kasih ngagai Petara laban udah meri padi ti mayuh ba taun ke udah.

“Sanggal tu deka diengkah ba ruai rumah sepengelama empat malam lalu kitai deka ngatur Gawai bukai ba dalam kampung dikena muka palan baru ngereja pengawa nanam padi,” ku Musin.

Misan madah, kampung deka ditebas pengudah Sanggal baru digaga dikena minta berekat bulih jereki maya pengawa nanam padi baru, kelimpah kelai kitai bebasaka semengat padi tu.

KETUAI GAWAI… Misan Satuk, Ketuai Gawai ba Kampung Benuk Puncak Borneo

“Pengawa Gawai patut dulu digaga enti kitai deka nanam padi ba endur ke baru.

“Aku meseti nyaga Sanggal enggau nitihka penti pemali baka enda tau makai tubu, paku dikena nagang diri ari sakit,” ku iya nerang.

Semina orang ti dipilih aja nyaga Sanggal tu lalu bisi lapan iku ulih nyaga Sanggal tu ti diketuai Ketuai Gawai enggau pemantu iya.

Sanggal tu digaga ari asil kampung baka kayu enggau rutan kelimpah dan buluh seraya kayu deka ditanchang begulai enggau pemakai.

“Gawai mega diatur ba dalam Baruk, sebuah rumah asal beumur beratus taun ti nyimpan keruntuk pala lama lalu kami meri keruntuk pala nya mandi. Tu meh keresa ti dijaga kami.

PETARA GAWAI… Sanggal nyadi endur dikena meri terima kasih ngagai Petara ti udah meri jereki ngagai orang ke bumai.

“Ba pengawa miring, kami deka nyayat manuk kena ngulihka darah digulai ngena ai nyiur, lalu deka diengkah ba Sanggal kelimpah diayan enggau pemakai bukai baka kuih. Pengawa tu nyadi kelai kitai bebasaka pengawa tu ngambi enda ngachau bala peranak maya Hari Gawai tu,” ku iya.

Pengudah lapan hari, kami deka muai perengka tu ba seberai sungai tang enda tau ditunu nangi diperaka bala peranak ngambika enda kena tinggang penusah.

Ku Misan, aki iya udah ngajar semua penemu enggau kuasa iya nyadi Ketuai Gawai kenyau 20 taun ke udah.

“Maya iya (aki) beumur lebih 90 taun ba taun 1972, iya kala madah deka meri penemu nya ngagai aku lalu meri jaku ajar meri nembiak mandi ba Barok lalu minta Petara ngubat sakit nya.

“Aku deka meri sida ke sakit, mandi ngena ai ari Barok laban mayuh sida sakit ketegal lemi semengat,” ku Ketuai Gawai.

Misan diatu benung chakah ngajar enggau bekunsi penemu ngagai rebak baru laban deka ngangkatka penyelai tradisi main asal raban bansa Bidayuh ba kampung nya pasal adat enggau main asal ti nyadi Ketuai Gawai sida.

“Nembiak rebak baru patut temegah lalu ngangkatka adat asal kitai,” ku Musin ngelalau.

ADAT ASAL… Ketuai Gawai enggau bala bukai benung ngatur pengawa ‘Miring’.