Asal sida nitihka atur undang-undang menua, ku Kelvin Yii

KUCHING: Semua parti bela tau nganjung diri bepekit dalam pengawa bepilih, enda ngira parti nama alai orang nya bediri, ku Kaban Parlimen Kelvin Yii Lee Wuen.

Ku Kelvin lebuh dirandau pasal penemu iya enti sema pengari ari Parti Bumi Kenyalang (PBK) deka bediri dalam pengawa bepilih sitak Bandar Kuching, iya madah sapa-sapa aja tau bediri ngarika parti sida.

“Nyadi siti menua ti ngemeranka atur demokrasi, kitai endang ngelaluka sebarang parti politik ti deka ngetanka menua tu.

“Asal sida nitihka atur undang-undang menua,” ku iya.

Kelvin mansutka jaku tu pengudah aum pemberita di SK St. Teresa ba ditu, kemari.

Naka ke diatu, ku iya, pengari PBK semina nunjukka penau deka bepilih ba renggat kaunsil nengeri aja.

Enggau nya mega, iya meri jaku tabi puji ngagai Voon Lee Shan laban udah dipilih nyadi Presiden PBK ke baru.

Parti Bumi Kenyalang (PBK) siti ari parti politik Sarawak ti udah ngerejista diri enggau Opis Pengerejista Gerempung (Ros) ba taun 2013.

Apin lama ti udah, Voon Lee Shan, siku orang ti mangku pengawa nyadi luyar udah dipilih nyadi Presiden PBK ke baru ba renggat 2019-2022.

PBK mega disadang deka bepekit ba semua 82 penuduk ba pengawa bepilih nengeri ti deka datai.

AUM PEMBERITA… Kelvin Yii mansutka penerang ba aum pemberita di SK ST. Teresa ditu kemari. Bela dipeda Prinsipal SK St. Teresa Mary John (dua ari kiba) sereta Komiti Pengatur SK St. Teresa, Cynthia Maria Zehnder (kanan).