KUCHING: Mensia mayuh ti apin kala nemuai ke Kampung Danu ti tebilang nama enggau ikan tagang iya, datai mih kena 21 nyentuk 23 Jun tu meda sereta ngerichahka agi Pengerami Ga’ak Danu 2019.

Pengerami keterubah dirami tu diatur begulai Opis Pelilih Mit Padawan enggau JKKK Kampung Danu ti mandangka ekosistem sereta rampa menua asal di sebengkah ari genturung pendiau Bidayuh di sepanjai sungai Sarawak kiba nya.

Kenu ku Pemesai Pengatur Pengawa Opis Pelilih Mit Padawan ti nyadi chairman pengatur Rangen Jamang, pengerami tiga hari berunggu tu deka mantaika bemacham main di sungai, mandangka main asal enggau pengawa mandang ari ejensi perintah nengeri ti bekaul.

“Batang tuju pengerami Ga’ak Danu deka ngelaku enggau ngangkatka penampak nama Kampung Danu ngagai komuniti luar kelebih agi pemanah rampa menua asal sungai sereta pejalai Sistem Tagang ti udah bisi kenyau ari taun 2016 di genturung pendiau tu,” ku iya lebuh dirandau Suara Sarawak kemari.

Ku Rangen, tuju bukai ngambika bala komuniti ditu sedarka pemesai guna pangku pengawa nyaga rampa menua asal enggau ekosistem sungai.

Berebak enggau nya ku iya, pengerami tu mega meri peluang dagang ngagai komuniti menua pesisir nengah pengawa nyendiaka bangsal dagang pemakai, kraf jari enggau palan diau bemalam tauka homestay seraya ngelakuka produk ekodagang temuai ti bisi ditu.

“Pengerami tu dikena kami meri sukung ngagai pengawa dipejalaika Perintah Sarawak ngelakuka Taun Nemuai Ke Sarawak 2019.

“Tu mega dikena mantaika adat asal enggau gaya idup raban bansa Bidayuh di menua tu ngagai bala pengusung ti datai ngulu pengerami tu kelebih agi bala temuai ari menua luar kelimpah ngelakuka Sistem Tagang Kampung Danu ngagai renggat tinggi agi,” ku iya.

Bemacham atur pengerami bisi dirintai ngambika disereta mensia mayuh baka pekit nginti, Pelanda Mar Ga’ak Danu, pekit Poco-Poco ti nyendiaka perais mata duit ngagai bala pemenang.

Kelimpah ari nya, lumba ai tauka lumba rayat, nangkap ikan tagang bebala mayuh mega bisi diatur.

Pengerami Ga’ak Danu 2019 disadang dipenyadi Sapit Kepala Menteri Datuk Amar Douglas Uggah Embas kena 22 Jun seraya pengawa nutup deka dipenyadika Menteri Muda Perengka Pengangkut ti nyadi Kaban Kunsil Nengeri (Adun) Mambong Datuk Dr Jerip Susil.

TESAU PENGERAMI… Mensia mayuh diperansang datai ngulu Pengerami Ga’ak Danu 2019 deka diatur berengkah ari 21 nyentuk 23 Jun tu.