KUCHING: Perintah Sarawak ngagihka belanja penyampau RM100,000 ungkup Anugerah Pemberita Kenyalang (KJA) 2019.

Presiden Gerempung Besai Pemberita Sarawak (FSJA) 2019 Hii Hong Wee madah penyereta anugerah tu dibuka bepun 17 Jun ngagai 12 Julai taun tu ngagai semua pemberita baka media chelak, elektronik enggau online ba Sarawak dikelalu nganjung berita sida ngagai KJA.

“Taun tu borang penyereta tau diambi ari raban komiti KJA tauka Gerempung Pemberita Bagi Menua Kuching (KDJA), FSJA Sibu, Gerempung Pemberita Utara Sarawak (NSJA) lalu meseti dianjung ngagai Institut Akhbar Malaysia.

“Semua artikel ti pansut dalam taun 2018 ulih enggau ngerebut anugerah KJA ti deka diatur ba RH Hotel ba Sibu kena 25 Oktober tu ila,” ku iya.

Hii Hong Wee madah pekara nya pengudah penemuai meri basa ngagai Kepala Menteri Datuk Amar Abang Johari Tun Openg lalu nerima replika chek ari Kepala Menteri enggau pemelanja bukai baka Petronas, Shell enggau Sarawak Energy Bhd ba Opis Kepala Menteri ditu, kemari.

ANUGERAH PEMBERITA…Kepala Menteri Datuk Amar Abang Johari Tun Openg (lima kanan) begambar kenang enggau Presiden Gerempung Besai Pemberita Sarawak (FSJA) 2019 Hii Hong Wee (tujuh kanan) sereta pengari pemelanja anugerah KJA ba Opis Kepala Menteri ditu, kemari. -Gambar Gazhali Bujang

Iya nambah, bagi kategori ekonomi digital semina artikel bepun 1 Julai ngagai 31 Disember 2018 aja ulih enggau ngerebut anugerah nya.

“Laban diatu bisi portal berita online, pemberita ari portal berita online mega ulih enggau KJA lalu sida ulih nganjung penyereta ari mayuh kategori.

“Terima kasih ngagai perintah nengeri udah meri belanja RM100,000 ngagai KJA 2019 lalu sukung ari pemelanja emas baka Petronas, Shell enggau Sarawak Energy Berhad ti meri RM50,000 bagi tiap pemelanja,” ku iya.

Ditumbuhka ba taun 1988, KJA nyadi pengerami meri anugerah ninting taun ngagai pemberita media cetak, penyiaran, pemberita dalam online enggau tukang ngambar (juru gambar) ba Sarawak.

Sama datai ba penemuai basa nya Menijar Besai Perintah Shell Jonathan Jolly, Menijar Besai Kaul Luar Shell Jong Lee Fah, Menijar Besai Komunikasyen Korporat Sarawak Energy Berhad Peing Tajang, Menijar Petronas Sarawak Norazibah Md Rabu, Sekretari FSJA Jane Moh, Tukang Wang FSJA Ting Kung Yien, Chairperson KDJA Jacqueline David, Presiden NSJA Andy Jong, Mandal Sekretari FSJA Affendi Khalik, Mandal Tukang Wang FSJA Zulazhar Sheblee enggau ke bukai.