Ngembuan mayuh bansa pengelandik nya bonus ngagai siku-siku orang. Ukai semua kitai diberi pemeri ke bansa nya laban Tuhan nemu sapa ti dipilih iya.

Orang ke ngembuan mayuh bansa penau tauka ” super talented” mai pengaga enggau peransang ngagai orang bukai.

Minggu tu berita ruai pemerindang bekunsika cherita enggau siku anak seni Iban ke chukup bepenau. Watt Enjup @ Larry Mengga Leslie madahka asal sigi ari Kuching lalu diatu pan gawa lalu ngentapka pendiau diri di Kuching.

Beumur 37 taun, Watt bisi pengelandik bemain muzik, belagu, main api, ngajat, silap mata enggau ‘stunt man’.

Siku-siku orang bisi rikod sejarah ba diri empu. Orang ke ngembuan mayuh pengelandik ba pekara seni tau dikumbai lebih komersial. Ambika chunto, penanyi ke nemu bemain silap mata mayuh agi peluang bulih kangau merindang.

Watt Enjup

Artis ke bansa tu lebih diguna ari artis ke semina nemu belagu tauka bemain muzik aja. Artis ke bansa tu dikumbai artis sereba ulih tauka “vetsatile”.

Iya mega nyadi artis Iban keterubah masuk program TV Tunggu Sekejap begulai enggau hos iya Datuk Awie dalam taun 2015 suba.

“Naka tu aku bisi dibai orang belakun dukomentari Road To Nationhood – Sarawak Declare. Kelimpah ari nya aku mega bisi belakun ba movie Bujang Senang (dalam proses).

“Iya ti bendar aku sigi rindu ba pengawa belakun kenyau ari mit,”ku Watt bekunsika penemu iya.

“Ba bidang lakun aku mayuh belajar ari youtube enggau TV. Taja pan munyi nya, sukung enggau peransang ari diri sebilik enggau bala pangan tetap beguna.

Semua anugerah enggau pemujur lagu nya mig ti ngangkatka nama iya.

Ba industri pemerindang di Sarawak Watt dikelala enggau pengelandik nebah sape. Kelimpah ari sape iya mega beberita landik “main api” enggau “main ular”.

(Berita penuh ulih dipeda dalam surat kabar Suara Sarawak pagila – 16 June 2019)


MERINDANG…Watt kala merindang mensia mayuh begulai enggau Datuk Awie.