“Anang sesekali ngambi jalai puntang minjau ba kompeni ti enda dikemendarka tauka dikumbai ‘along’.

KUCHING: Anang sengapa minjau duit ari institusyen wang lebih agi baka kompeni ti nadai belisin (along).

Chukup mayuh kompeni minjau duit ditumbuh enggau belisin dipeda ba menua tu.

Taja pia, mensia mayuh patut bejimat tauka berunding panjai sebedau ngaga pinjau ari palan wang laban sekeda nya nadai belisin taja iya chukup senang meri pinjau.

Pemberita Suara Sarawak berandau enggau siku orang ti kala gawa enggau kompeni minjau duit ti semina deka dikelala enggau nama Badrul.

Badrul, 27 taun madah, kompeni minjau duit belisin tau agi dipechaya laban chara sida minjauka duit enda nyalah baka bank.

“Aku gawa ba kompeni tu bisi setaun ari taun 2015, lalu lebuh nya aku gawa nyadi ‘office boy’.

“Tanggungpengawa aku baka betelefon ngagai orang ti laun mayar duit pinjau sida, nganjung notis ngagai rumah sida ke enda mayar duit pinjau nya,” ku iya.

Badrul madah, sapa-sapa ti minjau enggau kompeni belisin tu semina dipinta nunjukka salin kad pengelala, bisi penjamin, salin slip gaji tauka salin bil karan enggau ai aja.

“Dalam sebulan enda tentu penyampau orang ke minjau, kekadang bisi lima ngagai tujuh iku orang minta deka minjau duit ba kompeni nya.

“Tang enda semua sida tu dikemendarka kompeni alai minjau ketegal sebengkah pekara ti meri penanggul baka pom,” ku iya.

Berita penuh ulih dipeda dalam surat kabar Suara Sarawak pagila – 17 June 2019

BERUNDING PANJAI…Badrul nusi peneleba diri ti pasal kompeni ti meri pinjau wang ngagai Suara Sarawak.