LUBOK ANTU: Parlimen Lubok Antu begunaka mayuh agi belanja ari perintah besai ti dipegai Pakatan Harapan (PH) dikena bejalaika mayuh bengka projek infrastruktrur enggau projek pemansang rayat ngambi ngangkatka tikas pengidup peranak ba sitak nya.

Kaban Parlimen Lubok Antu Jugah Muyang madah, sida ngemeratka pengawa ngaga jalai alun, bekal ai beresi,pemansang pelajar enggau pengelantang peranak menua pesisir.

“Aku ngarap perintah di dipegai Pakatan Harapan ulih mai enggau meri pemansang kelebih agi diatu kitai endang beratika pemansang ba menua pesisir ti agi jauh tinggal dibanding ba mengeri,” ku Jugah madah.

Iya mansutka jaku nya beserimbai enggau Pengerami Ngiling Bidai Rumah Kaunselor Bangkong Ensawang 1, Skim Skrang, kemari.

Rambau pengerami nya, Jugah udah nyuaka geran penyampau RM35,000 ngagau Rumah Kaunselor Bangkong.

Iya ngarapka bantu tu ulih dikena nyeruri rumah panjai nya.

Kelimpah ari nya, Jugah mega meri geran RM10,000 ngagai JKKK Rumah Kaunselor Bangkong enggau RM5,000 ngagai Biro Indu Rumah Kaunselor Bangkong.

Pengerami tu dirami ngena mayuh macham aktiviti ti udah matak mayuh temuai ngelingi Rumah Kaunselor Bangkong, Skim Skrang.

Bisi datai ngulu pengerami tu iya nya Pemesai Pelajar Pelilih Lubok Antu Jim Andrew Janggi, Pemesai Bomba Gemong Batu enggau 13 iku Tuai Rumah ari sitak ngelingi Rumah Kaunselor Bangkong Ensawang 1, Skim Skrang

NUTUP GAWAI… Jugah (dua kiba) begulai enggau temuai ti dipebasa ke bukai ngiling tikai kelai Ngiling Bidai di Rumah Kaunselor Bangkong Ensawang 1, Skim Skrang, kemari.