KUCHING: Dibai ati keran ngetanka pesaka asal Batang Rajang; kain buriek, ngasuh Louis Kelaman, 32 taun, mansal diri mansang ba pengawa pengelandik jari kelebih agi nengah pelasar ekonomi digital.

Ku Louis, langkar dero kain buriek tu bepelasarka penau jari kitai nengkebang kelimpah pemintar kitai nipakka chura kain endur ngelekatka kerubung tekuyung buriek nentuka asil jari kitai nya laku enggau tetangkupka peminta makit industri kraf jari kemaya hari.

Rebut Peluang Dagang Digital

Rindu amat meda pemanah enggau pengalus asil tengkebang ti bisi dibantai sebelah media rama baka raban Whatsapp enggau Facebook, pelasar bekunsika penemu.

“Ba penemu aku empu, pemisi pelasar ekonomi digital dipejalai nengah polisi Perintah Sarawak diatu meri peluang besai ti patut direbut pedagang kraf di menua tu.

NYERUNGKAI DAGANG DIGITAL … Louis Kelaman

“Kitai mega nemu inisiatif ekonomi digital semampai nerima sukung ari bajet menua ti dipelaba deka nambah ba taun baru laban perintah ngemeratka pemansang sektor ekonomi tu.

“Bala ketuai menua kitai nyengkaum Kepala Menteri Datuk Patinggi Abang Johari Tun Openg mega sedarka pemesai pangka ekonomi digital tumbuh besai ba menua tu,” ku Louis andal.

Tambah mega ku Louis, Kepala Menteri mega kala minta rayat Sarawak meretika polisi ekonomin digital ti dipejalai dikena nyungkak ekonomi menua ngagai tikas tinggi agi.

“Enti kitai empu, kelebih agi bala pedagang ngaul industri kraf tu puntan meretika chara gawa tauka konsep ekonomi digital tu tau ngasuh tinggal di belakang ari sukut pemansang digital dunya.

“Tuju kitai ngaul diri ba dagang digital tu mega ngambika enda buta penemu Teknologi Pemadah enggau Arus Penyambung (ICT) ti ulih dikena ngemai produk kitai rembus ngagai makit entarabansa.

TULIN… Igi kerubung tekuyung buriek.

“Tu nyengkaum ba Facebook empu bisi disedia awak dikumbai ‘Market Place’, endur bala pedagang ngelaku produk nadai ngira pemakai, produk kraf nyentuka rumah suwa, semua bisi magang.

“Enda lebu enti kitai beamat-amat ngereja pengawa, tentu deka mansutka asil ti manah, nyungkak ekonomi seraya ngetanka produk pengelandik jari bansa kitai,” ku Louis meransang.

Ambika chunto ku Louis, sebarang penerang pasal kus, bengkel enggau kelas pengelandik jari ti diatur muntang dikerembai enggau diterima mensia mayuh nengah media rama.

“Jaku tesau kitai ti nyadi pengajar enggau pengemeran pengelandik jari tu datai ngagai raban diselinting, nya alai aku chukup beterima kasih ngagai perintah ti udah berunding enggau bejalaika polisi baka tu,” ku Louis madah nyemetak.

LANDIK… Macham kraf jari bisi dibantai ba bangsal mandang Louis nyengkaun Dunjung, Baju Buriek enggau ke bukai.

Louis diatu ku iya benung nguji nengkebang langkar dero buriek limpang ari pekayan asal tang agi ngetanka penulin seni nya nyengkaum kerubung tekuyung buriek, chara nyait enggau kain baldu ti dikena.

“Aku semina ngubah setail pekayan aja. Enti suba kitai nyait enggau nusuk kerubung tekuyung buriek tu ba kain enggau baju aja, tang diatu kitai nguji ba gaun sida ke indu.

“Penemu tu dikunsi bala mayuh sebelah ruai media rama lalu langkar enggau bungai dero diubah bepelasarka penau diri nengkebang sereta berundingka peminta makit ngambi ulih mekit produk ti udah bisi dijual,” ku iya nampung.

Lansa Pejalai Bengkel Buriek

Ngelansa pasal pejalai bengkel kain buriek diatur iya ku Louis, pemanah timbal diterima enggau peminta ari mensia mayuh nengah pelasar digital baka Facebook, bisi tiga kelas deka diatur dalam bulan Julai ti deka datai.

“Piak Emart Batu Kawa ditu minta aku ngelakuka kraf kain buriek nyengkaum ngatur Bengkal Nyait Kain Buriek, Bengkel Ngaga Sugu Tinggi, Bengkel Ngaga Baju Ujan Manik, Bengkel Ngaga Dunjung Manik enggau Bengkel Ngaga Tangu Moden.

“Sida mega bisi minta aku ngatur Bengkel Ngaga Sabun enggau kelas pengelandik jari bukai bepelasarka peminta penyereta.”

Ku Louis, iya enggau bala bukai ti sama ngemeranka pengawa pengelandik jari tu deka bebagi tu ngembing pejalai bengkel ti diatur piak Emart, mungkur empat pampang Emart ti bisi di Sarawak.

“Empat pampang Emart tu nyengkaum Batu Kawa enggau Matang di Kuching sereta Tudan enggau Riam di Miri.

“Bengkel Kain Buriek enggau Bengkel Sugu Tinggi dipungkal di Kuching seraya Bengkel Tangu Moden diatur di Miri kena 13 Julai.

“Udah nya Bengkel Kain Buriek enggau Sugu Tinggi di Miri berebak enggau Bengkel Ngaga Sabun di Kuching kena 14 Julai.

“Kena 20 Julai, kami sebuat deka ngatur Bengkel Kain Buriek, Bengkel Ngaga Sabun di Miri.

“Seraya Bengkel Kain Buriek, Bengkel Tangu Moden (21 Julai) enggau Bengkel Tangu Moden enggau Bengkel Ngaga Sabun (22 Julai) di Miri enggau Kuching.

“Udah nya kami nampung pejalai diri ngatur Bengkel Nyait Kain Buriek ungkup komuniti rumah panjai ndi Rumah Nading, Sebangki Pandak Lubok Antu kena 22 Julai.

“Bengkel Ngaga Kain Buriek tu mega deka ditampung aku ngagai menua Limbang enggau Brunei kena 27 Julai, ari peminta sida din,” ku Louis ngelansa silik pejalai iya.

Nangkan nya ku Louis, iya mega bisi nyendiaka servis nganta, ngepan enggau baju ngagai sida ti deka berami milah pinang nengah pakej kawin.

“Sida tu tau nguji meda ba kedai bakih aku, NoraBridal di Samarindah, Kota Samarahan, enda jauh ari CCK enggau Sen Sen Market.

“Kami duai bakih aku, Nana, naka ulih nyendiaka servis pemadu manah sereta ngemantupka ati bala kita ari asil keranjai jari kami duai,” ku Louis nyimpul randau enggau Suara Sarawak.

Barang sapa ti bisi ati ngambi bagi ba pejalai bengkel enggau penerang silik tau betanya ngagai Louis (0192344562) seraya ba servis Ngepan Saribas dikena pengerami melah pinang, tau telefon tauka whatsapp Louis empu enggau Nana 0178074789.