SRI AMAN: Nyerumba Gawai Dayak taun tu peranak Rumah Agal, Kampung Panggil di Sri Aman bisi nirika gawai niat ti dikumbai Gawai Mangkung Tiang kena 5 Jun tu tadi.

Sida serumah dulu nibarka jaku tesau ngabang gawai sereta ngerami gawai besai ti didiri nyengkaum ngangauka pengabang ari Tim Projek Pensel sereta bala bukai.

Ku Pemungkal Projek Pensel Norina Umoi Utot, sida sebuat nerima kangau ngabang Gawai Mangkung Tiang enggau ati ti chukup pengaga sereta gagit.

“Manah amat burung kami sebuat taun tu nyau bejurut nerima kangau ngabang ari peranak ngelingi Simanggang ditu, kenyau ari 31 Mei nyin tadi.

“Kami sebuat mega bisi kena ambi sida Rumah Agal ngabang lalu ati berasai gagit amat ngulu pengerami mangkung tiang sekali tu,” ku Norina lebuh dirandau Suara Sarawak.

BASA PENGABANG… Norina ngulu bala bukai nabi peranak rumah panjai ti bisi ngelalu penatai sida ti duduk di ruai.

Ngelansa pasal gawai nya ku iya, kebuah bukai orang nirika gawai tu laban sida ti bempu rumah beniatka diri betuah belimpah, bulih tengkira enggau duit ringgit sereta bulih pengeraja ari tulung petara ti dikumbai Anda Mara Raja Tuah.

“Tu mega sebagi ari gawai niat ti diintu dikena minta berekat ari Petara enggau besampika rumah panjai ti baru udah tembu likun endur diau lalu nadai penti pemali bukai.

“Gawai tu besai endar reti ngagai sida ti empu pengawa laban tu mih tanda pemujur pengawa berumah ti udah dikereja betaun pengelama, ukai nya nyamai berumah baru.

“Ari sukut perengka enggau ramu berumah diatu majak mar, chara ngentak enggau ngaga rumah mega bepelasarka penau enggau penemu runding diri serumah, ari pemutus aum semua.

“Ukai baka ngaga rumah ngembuah, penemu ngaga rumah panjai tu enda tau enda sebaka, saum runding baru pengawa tau mujur. Tu nyengkaum ripih bilik, chura dinding enggau mayuh utai bukai meseti dibai dalam aum,” ku Norina bejaku ba mua mayuh.

NANGGAM KAUL… Norina begambar enggau bala tuai rumah lebuh ngulu Gawai Mangkung Tiang di Rumah Agal, Kampung Panggil ditu.

Nya kebuah ku Norina, iya meri tabi puji sereta basa besai ngagai Rumah Agal serumah laban udah mujur nyapai juluk sida, rumah udah mega tembu enggau meruan.

“Berasai untung amat laban ampit enggau bala mayuh meda gaya atur gawai bansa tu seraya berami enggau sida serumah ngerami rumah panjai baru.

“Sampi aku ngajihka kita diau lantang senang, betuah belimpah, chelap embap, likun enggau gerai nyamai nguan menua,” ku sampi iya.

Penatai sida sebuat dilalu enggau chukup adat basa orang ti ngempu rumah, diiring niti ruai ngena tabuh enggau ajat lalu diduduk ba ruai tuai gawai kelimpah dinah macham pemakai asal enggau tuak gawai.

Sama datai ngabang Ketuai PKR Sri Aman Yen Jebeni, Ketuai AMK PKR Sri Aman Lawrence Temba, Chairman Gidsa Bonnie Langkop disempulang bala bukai.

DIPEBASA… Norina nibarka peransang diserumba enggau sampi ngajihka sida bempu rumah betuah belimpah.

 

KENANG JEMAH… Norina enda muai awak begambar ungkup kenang begulai enggau bala kaban Biro Indu Rumah Agal.