BETONG: Perintah Sarawak ngena belanja RM39 juta dikena ngaga jalai altenatif ngagai lima buah rumah panjai ngambi ulih meri pemaik ngagai peranak menua nya.

Adun Layar Gerald Rentap Jabu madah, projek ngaga enggau nembuka Jalai Sekatap, Meribong, Nanga Jelau, Jelau Atas enggau Batu Lintang nya diperambu tembu Januari 2021.

“Jalai pemanjai 12.13 kilometer (km) digaga ba sepiak kanan Sungai Layar tu deka nyadi penyambung lima buah rumah panjai ngagai Jalai Pan Borneo.

“Tu endang jalai altenatif ngagai peranak rumah panjai ti ngena Jalai Ulu Layar enggau jalai kampung ngagai rumah panjai Jelau Atas.

“Pengudah jalai tembu ila, peranak ulih berimbka tanah lalu dikemansang enggau utai tanam ti mansutka asil kelimpah nyamai endur sida mindah ngereja pengawa,” ku iya.

PEMINTA RAYAT… Robert bejadika pengawa nasih tanah ngaga Jalai Sekatap, Meribong, Nanga Jelau, Jelau Atas enggau Batu Lintang seraya dikemata Rentap, ditu kemari.

Iya mansutka jaku nya lebuh miring beserimbai enggau pengawa ngaga Jalai Sekatap, Meribong, Nanga Jelau, Jelau Atas enggau Batu Lintang, ditu tadi.

Pengawa nasih tanah tu dipenyadi Kaban Parlimen Betong Datuk Robert Lawson Chuat.

Sama datai Penyanding Penemu Pansik Sains Nengeri Datuk Patinggi Tan Sri Alfred Jabu Numpang, Residen Bagi Menua Betong Friday Belik sereta bala ketuai opis, ketuai genturung pendiau, ketuai raban bansa enggau peranak diau ngelingi.

Ku Rentap, projek rayat tu disediaka Perintah GPS ti seruran berati enggau naka ulih nangkup peminta peranak menua pesisir.

Projek ngaga jalai pemanjai 12.13 km tu dipejalaika kunterikta Sawaja Maju Sdn. Bhd lalu jalai digaga begembar dua nitihka pemesai standard R1.12.13 km.

Jalai deka dibagi ngagai sekeda endur baka jalai besai penyauh 4.82 km, jalai nuju rumah panjai Meribong 1.6 km, jalai ngelawa rumah panjai Nanga Jelau 1.66 km enggau dua buah jematan sereta jalai ngelawa rumah panjai Batu Lintang 4.05 km enggau sebuah jematan.

Jalai tu deka meri pemaik ngagai 500 iku peranak ari lima buah rumah panjai enti tembu ila.

TERIMA KASIH… Projek ngaga Jalai Sekatap, Meribong, Nanga Jelau, Jelau Atas enggau Batu Lintang ti disadang tembu 2021.