KUCHING: Sepenyampau 126 iku atlit ari 15 tim deka bepekit ba Pekit Angkat Berat Junior enggau Senior Renggat Nasional Sarawak 2019.

Mandal Presiden Gerempung Angkat Berat Malaysia (PABM) ti mega Presiden Gerempung Angkat Berat Nengeri Sarawak (PABNS) Gerald Rentap Jabu madah pekit tu dikena nyikap bala atlit sebedau bepekit ba renggat Lumba Malaysia (Sukma 2020) sereta lumba entarabansa bukai.

“Pekit deka diatur ba palan bebeli barang, The Spring ditu, berengkah ari 23 nyentuk 28 Jun tu.

“Tim ti deka bepekit datai ari Sarawak, Sabah, Johor, Pahang, Soldadu Malaysia (ATM), Polis DiRaja Malaysia (PDRM), Perak, Selangor, Terengganu, Kedah, Perlis, Putrajaya, Kaunsil Lumba Menua (MSN), Kelantan enggau Pulau Pinang,” ku iya.

Gerald Rentap mansutka penerang tu rambau aum pemberita di Stadium Sarawak ditu tadi.

NERANG… Gerald Rentap Jabu (duduk tengah), Dr Ong Kong Swee (duduk kanan) enggau Leonard Jambu (duduk kiba) ba aum pemberita di Stadium Sarawak ditu tadi.

Pia mega ku iya, Sarawak bisi nganjung 11 iku atlit bepekit, tiga iku senior enggau lapan iku junior.

“Bisi 10 kategori pekit ungkup lelaki enggau indu ba dua bengkah pekit iya nya ‘snatch’ enggau ‘clean and jerk’.

“Ba lelaki kategori berengkah ari 55kg ngagai 109kg enggau berat agi lalu kategori indu ari 45kg ngagai 87kg enggau berat agi,” ku iya nerang silik.

Iya bisi amat pengandal ngagai tim Sarawak deka teulihka pemujur ba pekit tu seraya matih atlit junior regas ba runding sebedau nyereta pekit besai agi dudi hari.

“Siku dua atlit diperati bisi pengulih datai ba renggat tinggi agi baka renggat dunya ba lumba nya,” ku iya.

Nangkan nya Direktor Kaunsil Lumba Nengeri Sarawak (MSNS) Dr Ong Kong Swee madahka sebedau bepekit, bala atlit deka diperesa ai kemi nengah ujian doping dipejalai Ejinsi Anti-Doping Malaysia.

Ba lansa bukai ku Gerald Rentap, ungkup Lumba Sarawak (Suksar) ke alai MSNS udah nyendiaka tujuh palan pematih di Limbang, Tinjar, Bakong, Miri, Sibu, Sarikei enggau Kuching ungkup tim atlit angkat berat menua tu.

Pekit tu diatur ari kerejasama begulai PABM, PABNS, MSNS, Perintah Sarawak enggau palan bebeli barang The Spring (melanja palan pekit).

Menteri Muda Nembiak enggau Lumba Snowdan Lawan deka bejadika pekit kena 23 Jun lalu pengawa nutup disadang dipenyadika Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah.

Sama bisi datai ba aum pemberita Tukang Wang PABNS, Leonard Jambu.