SRI AMAN: Pengerami Ngiling Tikai nya adat asal ti dikemeran raban bansa Dayak Iban nyentuk sehari tu dikena ngelai Gawai tembu diintu.

Ku Penyanding Penemu Gerempung Indu Dayak Sri Aman (Gidsa) Norina Umoi Utot, sebedau datai ba hari Gawai Dayak nyadi, tikai dulu agi dikerembai tauka dianchau ba ruai.

“Pengawa tu dikumbai kitai beranchau puang lebuh kitai nyendiaka diri ngintu gawai ti mit baka Gawai Dayak.

“Nya alai pengawa kitai sehari tu dikumbai Ngiling Tikai, ukai ngiling bidai, laban ukai bidai ti dianchau kena ngerami gawai,” ku Norina lebuh bejaku ba mua mayuh rambau ngabang ngagai Rumah Deri Kasin, Kampung Panggil Ulu, Sri Aman, 7 Jun tu tadi.

Iya madahka diri lantang ati meda rebak baru nampung pengawa lama enggau adat asal kelebih agi lebuh ngintu gawai.

NYINUK… Peranak Rumah Deri enggau pengabang bukai mendingka jaku ditibar Norina sebedau ngiling tikai.

“Baka nya basa lebuh mungkal gawai, baka nya mega basa kitai nutup iya laban tu hari besai bansa kitai ti nyadi kelai bansa sereta ngemai bansa pegari nama,” ku Norina madah nyemetak.

Ku iya, nyauka genap rumah panjai di menua tu deka ngintu pengerami nutup gawai, sekalika ngiling tikai tauka ngiling bidai, nitihka utai dianchau di ruai.

Nya kebuah iya temegah ati diambi ngabang ngagai pengerami ngiling tikai ngagai rumah panjai nya sebedau mulaika diri ke mengeri pengudah abis kemisi.

“Pemanah basa bala tuai rumah enggau nembiak redak semampai dikenang kami sebuat, ari terubah kami niki ke rumah, dibai duduk betunga lalu dirandau sereta dinahka pemakai lalu dibai makai serumpu di ruai.

“Mayuh amat batang pekara dikenang kami lebuh nya, ari pekara rama, sekula enggau pelajar, bantu pengelantang sereta mayuh ke bukai nyengkaum peminta projek pemansang ari perintah,” ku Norina ngelansa lebuh dirandau Suara Sarawak seraya meri puji ngagai peranak rumah panjai nya.

AGI LANDIK… Norina nebah engkerumung begulai enggau bala kaban Biro Indu Rumah Deri, Panggil Ulu.

Nangkan nya ku Norina, iya mega ngamatka semaya diri ngemai tepa, baju kot, ngagai bala tuai rumah sereta nyuaka pemeri ngagai biro indu, dikena nyaup sida bejalaika pengawa.

“Aku ngarapka udah tu bala tuai rumah kitai bisi gari ti meruan agi maya ngulu pengawa ba opis perintah tauka program bukai sereta dipega gap sereta manding.

“Pia mega raban indu di rumah panjai tau ngatur program tauka pengawa ngemai pemaik sereta ulih mansutka belanja tambah ngagai ruang bilik sida.

“Nadai ngira baka ni gaya pengawa tauka chara kitai ngintu pengerami tu, batang pekara patut diperati iya nya tikai tauka bidai nya digiling ngelaika gawai taun tembu diintu lalu tikai deka dianchau baru ba gawai taun baru,” tandu Norina.

Sama datai ngabang Chairman Gidsa Bonie Langkop, Sekretari Gidsa Yen Jebeni sereta bala bukai.

KEMERAH… Norina ngerandau bala bukai ti sama duduk betunga lebuh makai serumpu di ruai.

 

NUTUP GAWAI… Bala tuai rumah enggau Norina ngiling tikai.

 

PENGINGAT… Biro Indu Rumah Agal, Panggil mega enda muai peluang begambar enggau Norina.

 

TERIMA KASIH… Bala tuai rumah enggau pengari tuai rumah begambar enggau Norina pengudah pengawa nyuaka tepa baju kot ngagai sida tembu.

 

NGAMATKA SEMAYA… Norina nganchin baju kot ngagai siku ari tuai rumah baka ti udah disemaya iya rambau pejalai sebedau tu.

 

KEMERAH… Norina ngerandau bala bukai ti sama duduk betunga lebuh makai serumpu di ruai.