“Perintah merambu nyendiaka rumah ti ulih diempu ngagai komuniti ti mindah ngagai mengeri enggau rega ti murah.”

KUCHING: Perintah Sarawak naka ulih nyendiaka rumah ulih diempu ngagai mensia mayuh ti mindah ngagai mengeri.

Kepala Menteri Datuk Patinggi Abang Johari Tun Openg madah rumah siti perengka ti beguna dalam pemansang laban nyendiaka mayuh macham servis sereta guna ngagai komuniti.

“Perintah merambu nyendiaka rumah ti ulih diempu ngagai komuniti ti mindah ngagai mengeri enggau rega ti murah.

“Siti tanah premium ngagai komuniti ti mindah nurun ngagai RM 2,500 aja siti lot taun 2018,” ku iya.
Abang Johari mansutka jaku tu rambau pengerami Gawai Ngiling Bidai 2019 ti diatur ba siti hotel tebilang ditu, kemari.

BIDAI… Temenggong Datuk Bernard nyuaka bidai ngagai Abang Johari ke kelai pengerami Gawai 2019 ti diatur raban Komiti Bertindak Ketuai Komuniti Tuai Rumah Pelilih Kuching enggau Pemaik udah tembu.

Nangkan nya, ku iya, ba lot tanah nya tadi, rumah ulih didirika orang ti bempu tanah nya, tang Perintah Sarawak deka nyendiaka semua perengka dikena ngaga rumah nya.

“Tu nyadika ungkus dikena ngaga rumah nya lebih mit lalu pengawa ngaga rumah nya lebih murah.

“Perintah Sarawak mega nyendiaka infrastruktur baka jalai alun, parit besimen, tembok enggau ke bukai,” ku iya.

Ku iya, sida udah beratika palan alai ulih ngagai endur genturung pendiau ti baru baka di Stapok, Sungai Maong, Segedup sereta palan besemak enggau Batu Kawa lalu palan tu diperatika chukup engkeman alai muka genturung pendiau ti baru.

“Perintah Sarawak seruran beratka penanggul ti ditapi bala rayat.

“Aku nemu, enggau pemansang ti ditapi di mengeri sereta pemayuh mensia ti majak nambah ngasuh penanggul bekaul enggau pengawa rumah majak nyadi,” ku iya.

Lebuh nyaut pinta ari Tuai Pengabang Temenggong Bernard Aggan Assan bekaul enggau penanggul kurang pendam ba mengeri, Abang Johari madah iya deka mansik penanggul bekaul enggau pekara nya.

“Tu ukai semina ditapi rayat kitai di mengeri tu, tang mega di Sibu.

“Tu nyadi siti polisi rama kitai alai kitai ukai semina meri fokus ngagai sida ti agi idup, tang mega ngagai sida ti udah lesi bebadi ari dunya tu,” ku iya madah.

Berebak enggau nya, iya mega madahka perintah udah numbuhka siti kompeni ti diempu Perintah Sarawak iya nya Mutiara Mortgage and Finance dikena mantu meri pinjau ngagai sida ti deka meli rumah.

“Tu siti ari chara kami mantu rayat ngambika rayat tau bulih rumah lebih agi ngagai sida ti mindah tu tadi.

“Kompeni tu ditumbuhka ngambika pengawa ngemuntang pengawa minjau ba pekara berumah lalu ukai semina ulih digaga ba bank aja,” ku Abang Johari.