KUCHING: Anang malu beperesa ngagai lutur sentang penyakit riman, ku Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah.

Iya madah penerang pasal penyakit riman patut ditusi ngagai mensia mayuh.

“Riman tu semina seleka jaku ngagai sebengkah penyakit tang ukai penyakit ti tau munuh nyawa tekala nya.

“Nya alai, nyema penyakit tu ditemu tumu peluang endur suman ari penyakit nya besai agi,” ku iya.

Fatimah mansut pekara nya ba aum pemberita lebuh nerima penemuai basa ari Society Cancer Advocacy Awareness Kuching (Scan) ba Begunan Baitul Makmur ditu, kemari.

ANANG MALU BEPERESA…Datuk Sri Fatimah Abdullah (empat kiba), Dunstan Chan (enam kiba), Major Francis Ng (tiga kiba) enggau raban kaunsil begambar bebala mayuh di Begunan Baitul Makmur ditu, kemari.

Ba penemuai basa nya Fatimah dikangau nyadi temuai dipebasa ba Pengerami Ulang Taun Ke-2 Makai Lemai Scan dikena ngumpul belanja gerempung nya ba Sarawak Club kena 24 Julai tu ila.

Kelimpah ari nya, Fatimah madah raban Scan tu mayuh ngaga pengawa ba kereja meri pengarap, pekara bekaul riman enggau pekara ngubat riman ngagai sida ti dituntung penyakit tu.

“Scan tu mayuh bejalaika pengawa manah baka ngaga survei pasal orang riman, ngaga servis enggau nulung sida ti dituntung penyakit tu ari sukut mental baka meri jaku ajar tauka meri semengat.

“Nya alai, sida merambu mayuh projek ngagai mensia mayuh awakka nemu pasal igi penyakit tu baka ngeluarka bup pasal riman dalam jaku English, nyalin bup pasal riman ngagai jaku Melayu enggau China, ngaga latih tauka kaunseling penakut ditepan riman enggau ke bukai ti begunaka belanja,” ku iya.

Nangkan nya, Presiden Scan Sew Boon Lui madah sida nagit RM10,000 belanja ulih digumpul ari pengerami makai lemai nya ila.

“Kami begunaka belanja tu dikena nusi sereta mantu mensia mayuh ti bedau entu nyementak nemu pasal riman tauka malu lebuh dituntung penyakit riman.

“Ba pengerami makai lemai nya kami deka ngelancharka bup “So You Have Cancer – What Now? A Guide for Patients’ tu bekaul sentang pekara ti patut digaga enggau diperambu lebuh napi penyakit tu,” ku iya.

Gerempung tu udah mantu urung 20 iku pesakit riman kenyau ditumbuh dua taun nyin kemari.

Barang sapa deka nemu pasal gerempung tu enggau silik tau ngelawa ‘facebook’ sida ba fb.com/scankch.

Sama bisi datai ba penemuai basa nya Mandal Presiden Scan Stephen Yeo enggau Penyanding Penemu Scan Datin Dayang Mariani Abang Zain.