MUKAH: Tebal agi bala ketuai raban bansa di Mukah baka Temenggong, Pemancha, Penghulu, bala ketuai genturung pendiau enggau tuai rumah sereta bala komuniti di menua pesisir besemaya nerima manah sereta nyukung GPS enggau Perintah Sarawak.

Ukai ketegal sida nerima elawin ninting bulan ari Perintah Sarawak tang talukka GPS laban parti nya ulih dikeandal gawaka pengelantang rayat menua tu.

Ku sida, GPS tu sebuah parti negika juluk peranak Sarawak ti ngemeranka demokrasyen pulaika pemaik semua.

Beserimbai enggau pengawa ngelancharka GPS Zon 10 kena 22 Jun tu di Rumah Kalang, Ulu Badengan, Jalai Bayan Ulu, pemberita SV ngerandau sekeda ketuai raban bansa deka ninga penemu pasal gempung parti nya.

Temenggong Hendi Suhai, Ketuai Raban Bansa di Mukah madahka rayat nyengkaum sida ke diau di Mukah patut nerima GPS bepelasarka penaluk sida ngagai parti ti megai Perintah Sarawak baka ngelama tu.

Temenggong Hendi Suhai

Ku iya, GPS ti nyumbuk ari PBB, PDP, SUPP enggau PRS endang nerima sukung tegut sida ti nyadi ketuai dia laban parti nya dikeandal bisi kuing politik ti nyata, ngetanka hak enggau pemerat menua tu kelimpah ngintu nasip rayat kelebih agi ti diau di menua ulu enggau menua pesisir.

“Nadai pilih bukai, semua rayat Sarawak enda tau enda begempung enggau seati ngambika peminta kitai nyarih agi didinga sereta dipebasa,” ku iya.

Seraya Penghulu Ambau Anak Achong, Ketua Raban Bansa di Nanga Baoh Dalat madahka diri berasai lantang sereta mantaika sukung tegut ngagai GPS.

Ku iya, sejarah sebedau tu nyata ngayanka parti ti megai Perintah Sarawak tentu parti ti negika nasip rayat serap menua.

Nya kebuah iya ngansak rayat di Mukah enggau Sarawak seruran beserakup meri sukung ngagai perintah menua tu kelebih agi ba pengawa minta pulai hak disempekat ba Sempekat Malaysia 1963 (MA63).

Penghulu Ambau Achong

Nangkan nya, Penghulu Kampung Tellian, Lai Mayer Gabong minta rayat seruran ngenang budi lalu milih GPS nyadika kapal sida.

“Rayat menua tu ulih ngelempaika pengandal 100 peratus ngagai GPS laban sida tu ti gawa ngintu pengelantang enggau betatika nasip rayat, nyadi tulang belakang ngemansangka menua.

“Aku ngarika semua peranak Kampung Tellian berani madahka kami tetap bediri teguh begulai enggau GPS sereta bala ketuai di Sarawak.

Kenu ku penemu Ketuai Raban Bansa sitak Baoh Ulu, Penghulu Sabastian Anak Sintan, rayat deka meda GPS tu sebuah parti ti sikar gawa enggau bisi intergriti.

“Rayat enda tau enda seati, saum penemu nadai ngira penemu politik, bansa enggau pengarap, bela nyukung pengeran Perintah Sarawak ke diatu dikemudi GPS negika hak enggau pemerat menua tu.

“Pia mega bansa Iban, nadai ngira bida penemu kitai patut nerima GPS ngading enggau ngintu nasip rayat sereta nyendiaka perengka guna enggau pemansang ba kandang menua pesisir,” ku iya madah nyemetak.

Seraya Ketuai Kampung Seri Tellian, Bonaventure Juana enggau Manuchir Smit ngarika bala apai madahka hak Sarawak patut enggau enda tau enda ditanka parti ari Sarawak.

“Kitai mega meseti berani nulak parti politik ti ukai tumbuh ari menua tu nentuka pengelantang enggau peminta rayat seruran diintu.

“Penaluk enggau pengandal rayat kelebih agi menua ulu enggau menua pesisir patut diperati nitihka pematut,” tandu iya.

Penghulu Sabastian Sintan