Kena 4 Jun Kampung Long Busang dituntung penusah bah ketegal ujan bangat. Entara palan ti balat ampuh begunan SK Long Busang ti ditenggelam ai nyentuk ke perabung.

BELAGA : Sarawak Energy Berhad (SEB) kemari bisi nganjung bantu ungkup 350 iku peranak menua ari 136 buah rumah enggau Sekula Primari Long Busang ti dituntung penusah bah apin lama ke udah.

Menijar Besai tanggungpengawa rama koporat (CSR) SEB Jiwari Abdullah madah sida ngarapka bantu ti diberi ulih ngelempungka penusah ti ditapi peranak menua nya pengudah dituntung penusah bah ti ngeruga palan endur sida diau.

“Kami ngarapka bantu ti diberi tu ulih ngelempungka tinggang ti ditapi sida enda lama.

“Kami endang bekunsika penusah ati mensia mayuh ngagai pengelikun peranak kampung di Long Busang sereta gaga meda semua peranak kampung tu nadai nama-nama,” ku iya.

Jiwari madah pekara tu ba sebuah penerang berita ari SEB, kemari.

Tim SEB nyuaka barang pemakai baka berau enggau barang pemakai bukai ngena perau panjai merau niti sungai sepengelama lapan jam nengah ulu sungai Balui ari pengkalan Bakun.

Tim tu diuluka Menijar Kaul Komuniti SEB Augustine Supen Taja mega bisi ngelawa Sekula Primari (SK) Long Busang seraya meri bantu barang sekula ngagai bala nembiak dia.

Kelimpah ari nya, SEB mega meri bantu ngagai Komiti Pemansang Enggau Pengelikun Genturung Pendiau (JKKK) Long Busang dikena mantu pengawa nyeruri pengudah penusah bah.

Kena 4 Jun tu tadi Kampung Long Busang dituntung penusah bah pedalam dua ngagai lima meter ketegal ujan bangat sereta berunggu beberapa hari ngujungka genturung pendiau enggau sekula kena bah.

Entara palan ti balat ampuh empas ari penusah nya begunan SK Long Busang ti ditenggelam ai nyentuk perabung.

 

TERIMA KASIH SEB…Tim SEB diuluka Augustine Supen Taja (baris mua, empat kanan), Ketuai Kampung Long Busang Hj Yusof Zawawi (baris mua, lima kanan) begambar enggau peranak kampung pengudah nerima bantu.