KUCHING: Wang Turu Infrastruktur Dagang Temuai (TIF) ulih mantu nyungkak industri dagang temuai menua.

Menteri Dagang Temuai, Seni enggau Mai Asal Malaysia, Datuk Mohammadin Ketapi madah perintah udah ngungkupka dana beungkus RM 1 bilion nengah tabung tu enggau kerejasama ari Bank Pembangunan Malaysia Berhad.

“TIF nyendiaka bantu wang ngagai kompeni ti udah bisi, baru tauka sama bisi nyengkaum dalam pengawa servis dagang temuai.

“Bank pemansang tu meri kadar pembiayaan ti kompetitif ari empat peratus ngagai 5.5 peratus setaun ngagai sida tu deka ngemansangka industri dagang temuai menua,“ ku iya.

Mohammadin madah munyi nya lebuh bejaku ba pengerami bejadika Tabung Infrastruktur Dagang Temuai ti dipejalai ba siti hotel tebilang ditu, kemari.

Datuk Mohammadin Ketapi

Nangkan nya, iya madah tu nyengkaum pembiayaan ba pengawa meli tanah, ngaga begunan, perengka guna pemun,m sereta aset bekaul enggau pengawa dagang temuai.

“Penyamai ti ditapi ari TIF tu ngambika ulih mantu pengereja industri dagang tenuai ngerembaika dagang sida ti bisi kaul enggau imfrastruktur dagang temuai baka hotel, palan aum, taman, palan berubat enggau agro dagang temuai.

“Ngarapka nengah TIF tu ulih ngerichahka industri dagang temuai menua seriris enggau kimpin Nemuai Ngagai Malaysia 2020,” ku iya.

Tu dikena narit penatai 30 juta iku temuai ari menua luar enggau penatai pemisi dagang temuai penyampau RM 100 bilion.

Kelimpah ari nya, Mohammadin madah industri dagang temuai seruran nyadi kebuah ngagai penumbuh ekonomi menua lebih agi ba penatai bala temuai luar.

“Penumbuh ekonomi niki enggau penyampau 2.7 peratus iya nya urung 6.7 juta temuai ba suku keterubah taun tu dibandingka semina 6.5 juta ba timpuh ti sama tahun siti tu tadi.

“Ari sukut belanja sida temuai tu, Malaysia nerima asil penumbuh ti positif iya nya enggau penyampau 16.9 peratus ba suku taun tu,” ku iya nambah.

Sama bisi datai Menteri Wang Malaysia Lim Guan Eng, Presiden ti mega nyadi Ketuai Pemesai Eksekutif Gerempung Bank Pembangunan Malaysia Bhd Arshad Mohamed Ismail, Sapit Menteri Dagang dalam Menua enggau Pengawa Bebelika Barang Chong Chieng Jen, Kaban Parlimen Bandar Kuching Kelvin Yii sereta Kaban Kunsil Nengeri (Adun) Pending Violet Yong Wui Wui.