Sarawak enda rua laban ngembuan perambu ti strategik enggau silik bekaul enggau agih belanja

KUCHING: “Aku nemu pasal akaun. Berasai sinu Malaysia ngembuan siku menteri baka nya,” Pia ku Kepala Menteri, Datuk Patinggi Abang Johari Tun Openg lebuh mantah penerang Menteri Wang, Lim Guan Eng, kemari.

Hari lima tu tadi, Guan Eng madahka Sarawak deka bankrap dalam kandang tiga taun rambau pengawa politik ti diatur Pakatan Harapan ba mengeri tu.

Kebuah pia, nengeri tu ngembuan duit simpan penyampau RM30 bilion tang agih belanja pemansang nengeri tu bisi RM11 bilion ungkup taun tu.

Guan Eng madah, Sarawak deka napi penanggul nadai duit dalam kandang tiga taun baka Kelantan ti minjau ba Perintah Besai.

ADAT…Kepala Menteri Datuk Patinggi Abang Johari Tun Openg begulai enggau bala bukai miring maya pengawa bejadika GPS Zon 10 di Rumah Kalang, Ulu Bayan, Mukah.

“Sarawak enda rua laban ngembuan perambu ti strategik enggau silik bekaul enggau agih belanja,” ku Abang Johari rambau Pengawa Bejadika GPS Zon 10 di Rumah Kalang, Ulu Bayan, Mukah.

“Iya (Guan Eng) ngumbai aku aja ngena agih belanja nya tang iya enda nemu kitai ngembuan pemansut bukai.
“Kitai (Sarawak) enda ngena RM11 bilion nya aja tang kitai bisi pemansut bukai, dividen, premium enggau asil chukai.

“Taun tu aku deka ngumpul chukai jual minyak penyampau 5 peratus,” ku Abang johari.

Pemujur Perintah Sarawak ngembuan duit simpan manggai RM30 bilion tu laban perintah ngembuan tanggungpengawa enggau bekelimat lebuh ngatur agih belanja.

“Aku ngena RM11 bilion nitihka asil enggau pemansut bukai.

“Rizab RM30 bilion tu asil ari dagang parti orang Sarawak (GPS),” ku iya,

Abang Johari madah, RM11 bilion tu agih belanja aja lalu Guan Eng patut ngira baru penatai pemisi nengeri tu.

“Ba taun 2019, Sarawak ngembuan asil untung ari nyual minyak enggau gis penyampau RM3 bilion.

“Asil tu bedau dikira nyema bisi siti agi hak ngaul minyak enggau gis ti deka dipadah ujung taun tu,” ku iya.