DEBAK: Pengeransing bala ketuai dulu suba kelebih agi ba Bagi Menua Betong nyadi peransang ngagai pengari rayat ke diatu ngambi ulih neruska perambu pemansang.

Kaban Parlimen Betong Datuk Robert Lawson Chuat Vincent Entering madah, pangku pengawa ti dilempai ngagai iya deka mar dikereja nyema nadai nerima sukung ari semua rayat kelebih agi peranak Betong.

Robert madah, sukung tegut diberi ngagai ketuai dulu suba ngemuntangka sida merambu enggau bejalaika mayuh bengkah pemansang ti deka ngubah bagi menua Betong nyengkaum Saribas.

“Bepun ngangkatka Betong ari Pelilih ngagai status Bagi Menua lalu diatu udah berubah baka pemansang ari sukut pekara pelajar tauka tikas palan pelajar ke bisi ba Betong.

“Pekara tu nunjukka ketuai kitai endang ngemeratka pekara pelajar kelebih agi di sitak menua pesisir, nya alai kitai patut meri terima kasih ngagai sida,” ku Chuat.

KELAI BASA… Robert enggau Razi bela nerima tepa ari komiti pengatur Pengerami Gawai Raya 2019 Renggat Dun Saribas ke diatur ba Riveria Sport Centre, kemari. -Gambar OSMAN RAZALI

Iya mansutka jaku nya rambau bejadika Pengerami Gawai Raya 2019 Renggat Dun Saribas mega digulu Adun Saribas Mohammad Razi Sitam ti diatur di Riveria Sport Centre, kemari.

Robert madah, iya diatu benung nyambung pangku pengawa ti ditinggal Sapit Kepala Menteri Datuk Amar Douglas Uggah Embas nyadi Kaban Parlimen Betong enggau Razi ti nyambung pengawa Datuk Dr. Wahbi Junaidi deka beratika agenda pemansang penuh tu mujur dipejalai.

“Kami deka neruska pengawa tu ngambika pemansang di bagi menua Betong mujur dipejalai nyengkaum sitak Saribas tu,” ku Robert.

Iya mega madah, pemintar Kepala Menteri Datuk Patinggi Abang Johari Tun Openg nyerungkai pemansut penatai pemisi ke baru ungkup Perintah Sarawak (GPS) ulih neruska mayuh bengkah projek pemansang ngambika ulih nyendiaka perengkaguna enggau pengelantang rayat.

Robert temegah meda program ngerami Gawai Raya ngena konsep Pengerami Ngelaluka pengabang baka tu ulih nyadi pelasar nanggam kaul enggau pangan diri.

“Ba Sarawak, pengerami Gawai Raya suah dikait enggau pengawa ngabang entara diri sebilik, kaban belayan, orang ti beserimbai pendiau enggau bala kaban ngambika ulih ngerapitka kaul kelimpah ngenegap penyerakup.

“Kitai patut berasai temegah laban kaul ti ditanggam enggau raban bansa chukup rat lalu ulih mai pemujur ngagai Sarawah jemah,” ku iya.