“Kebuah pia, dalam taun tu Perintah Sarawak udah bebelanja RM11 billion, kira kitak empu, dalam tiga taun deka datai sida (GPS) deka bebelanja urung RM30 billion… nadai utai tinggal agi.”

KUCHING: Sarawak ulih bankrap dalam kandang tiga taun enti agi ba baruh pegai perintah Gabungan Parti Sarawak (GPS).

Menteri Wang Malaysia Lim Guan Eng madah tu laban dalam mulaika hak Sarawak enggau Sabah nyadi sebagi ari siti entiti ba pekara Sempekat Malaysia (MA63) perintah besai udah deka ngemendarka ubah undang-undang nya ba Parlimen apin lama tang GPS enda nyukung.

“Nya alai, aku minta kitak (rayat) nyukung Pakatan Harapan dalam mulaika kuasa rayat Sarawak enggau Sabah laban enti enda… dalam kandang tiga taun deka datai Sarawak deka bankrap.

“Kebuah pia, dalam taun tu Perintah Sarawak udah bebelanja RM11 billion, kira kitak empu, dalam tiga taun deka datai sida (GPS) deka bebelanja urung RM30 billion… nadai utai tinggal agi,” ku iya.

Lim Guan Eng

Iya mansut pekara nya ba Pengerami Makai Lemai Pengasih DAP ngena rambai jaku ‘Sarawak Here We Come’ ditu, ensanus.

Kelimpah ari nya, iya ngarapka Sarawak enda nyadi sebaka enggau Nengeri Kelantan ti nadai tebayarka gaji pengereja pengawa ketegal nadai duit.

“Anang nyadi baka Nengeri Kelantan ti enda tebayarka gaji pengereja pengawa nengeri sida empu ti semina beungkus RM20 million.

“Lalu ngujungka sida minjau duit ari perintah besai dikena mayar gaji pengereja pengawa perintah nengeri sida,” ku iya.

Nangkan nya, iya mega ngaku enda ulih mutarka semua penanggul menua munyi ti dipadah ba menifesto Pakatan Harapan dalam kandang setaun.

“Deka ngemujurka pekara ti udah dipegai perintah ti dulu megai 60 taun suba ngagai setaun ukai muntang.
“Tang sekeda ari nya udah digaga lalu Pakatan Harapan enda putus pengarap napatka danji sereta terus komited ngagai rayat,” ku iya.

Sama ngulu pengerami nya Sapit Menteri Dagang dalam Menua enggau Pekara Bebelika Barang Chong Chieng Jen, Kaban Parlimen Bandar Kuching Kelvin Yii sereta Adun Pending Violet Yong Wui Wui.