Sida ngerembaika muzik asal nyadi muzik moden

Betemu baru kitai ba ruai pemerindang ke minggu tu. Serak tu kitai bekunsika berita enggau cherita siti band ke nyelai ari band bukai. Band tu ukai semina mantaika muzik moden tang sida ngemasukka elemen muzik asal ( traditional element) dalam muzik sida. Konsep muzik sida bepelasarka muzik etnik Sarawak ti disegulaika sida enggau perengka muzik moden kelebih agi muzik asal kitai Iban.

Temaga Band (TB) ke bepalan di Kuching ditumbuhka dalam taun 2015 suba. Penumbuh band tu endang bepun ari aktiviti ti selalu begunaka sida lalu kedua laban sida bisi pengelandik bemain mayuh macham instrumen muzik.

Palan ke alai sida iya gawa mega besangkut-paut enggau main asal kitai Iban. Ba kontek industri pemerindang maya ke diatu, Temaga Band sigi chukup relevan laban sida ulih mantaika muzik moden enggau muzik asal. Penyelai konsep muzik sida ulih mai sida lebih “commercial” ari band bukai.

“Taja pan pia kami tetap bemainka semua genre muzik seagi kami ulih bemainka lagu enggau muzik nya”, ku Paulin Arah ke asal ari Lubok Antu tang udah lama gawa di Kuching.

Temaga Band

Konsep Muzik

Vokalis TB ke sempat dirandau Paulin Arah madahka muzik sida dibagi ngagai empat bansa. “Kami ari TB nguji ngaga penyelai ari band bukai. Naka ke diatu kami numpu ba muzik etnik asal, etnik kreatif, muzik moden enggau muzik pop.

TB bisi sepuluh iku raban ti betuaika Thomas Goh (sape / gitar), Keneth Bidi (keyboard/gitar/engkerumung), Leonard Stanley (drum), Henry Bennedict (bass), Nelson Bong (percussion/gendang), Jim Brown (sebang), Paulin Arah. Robert enggau Pearl Karung (vokalis)

Siti pemanah tauka penyelai TB nya raban band tu nemu bemain mayuh bansa perengka muzik. Ambika chunto, pemain keyboard sida landik mega bemain gitar, engkerumung, drum, gendang enggau instrumen ke bukai.

Kenyau ari taun 2015 suba, TB suah diambi orang merindang ba pengerami besai tauka “official function”. Paulin Arah madahka TB suah agi diambi bemain ba pengerami ti diatur opis perintah enggau gerempung ke setengah dikuasa perintah.

“Terubah pengawa merindang kami suba nya ba Pesta Ria Kuching Festival MBKS 2015, Launching 4 × 4 Wheel Drive International and Borneo Challenge Naim Chandra 2016, Gawai Renggat Nengeri 2017, What About Kuching 2017, Gawai Special 2018, Aum Besai Raban Pemenggi Tanah Sarawak Salcra, Waterfront Nite 2018, Gawai Special Nite 2019 enggau Gawai Renggat Nengeri 2019”, ku Paulin Arah.

Berita penuh ba Surat Kabar Suara Sarawak pagila 22 June 2019 (Hari Minggu)

PENANYI TEMAGA BAND… Robert (Kiba), Paulin (dua kanan) enggau Pearl (kanan).