“Nitihka cherita tuai, Raja Remaung nya ngumpan munsuh iya enggau mayuh umpan sepemanjai jalai dalam babas lalu barang sapa ti mansa lalu makai umpan nya, sida dikira udah kena kemelik ngena Taju Remaung.”

BINTULU: Jaku ti madah Sarawak deka bankrap dalam timpuh tiga taun munyiku jaku Menteri Wang Malaysia Kim Guan Eng nya sempama baka ‘Taju Remaung’.

Sapit Kepala Menteri Datuk Amar Douglas Uggah madah Taju Remaung tu digerah siku Raja Remaung ti chukup tebilang dalam bansa Iban dikena ngenakutka munsuh iya.

“Nitihka cherita tuai, Raja Remaung nya ngumpan munsuh iya enggau mayuh umpan sepemanjai jalai dalam babas lalu barang sapa ti mansa lalu makai umpan nya, sida dikira udah kena kemelik Taju Remaung.

“Sama mega ngagai kes Guan Eng, iya ngumpan nengah jaku iya. Enti rayat Sarawak pechaya ke iya, nya tanda kitai tu udah kena kemelik,” ku iya.

NERIMA TEPA… Uggah nerima tepa ari Syazwan rambau pengerami ngiling tikai ditu, kemari.

Iya mandingka pekara nya lebuh ngulu pengerami Gawai Ngiling Tikai ti diatur di Rumah Miekle Ding Seputan, Sebaoh ditu kemari.

Nangkan nya, iya madah jaku ti dipansutka Guan Eng nya siti ari jalai dikena ngelaban Gabungan Parti Sarawak (GPS) ti nyadi perintah nengeri diatu.

“Tu siti ari agenda digaga sida di Sarawak alai Perintah PH tau ngambi ulih ba pengawa bepilih ti deka datai.

“Enti tu nyadi, Sarawak nadai kuasa ngetanka hak enggau pengelebih Sarawak sereta pengaya ti dikembuan baka ti dipadah ba konstitusyen,” ku iya nerang.

Beduduk ari tu, iya minta rayat terus meri sukung ngagai perintah nengeri ba baruh pegai Kepala Menteri Datuk Patinggi Abang Johari Tun Openg, lebih agi ke guna nembiak rebak baru.

Uggah madah jaku ti dipansutka Guan Eng nya nunjukka iya enda beratika chara perintah nengeri ngatur sumber sida nyengkaum pengawa belanja.

“Rayat Sarawak patut nemu, Guan Eng udah nginsil mayuh projek pemansang ti beguna ngagai nengeri tu, nyengkaum tiga projek jematan,” ku iya.

Iya madah, Abang Johari udah ngiga chara iya empu alai begiga ke penatai pemisi lebih ke nengeri lalu nadai ngena simpanan nengeri RM 30 bilion baka ti dipadah nya.

“Ngambika banding, iya udah bejalaika atur lima peratus chukai ngagai petroleum enggau produk ari nengeri lalu tu mansutka penatai pemisi ti besai.

“Ketuai Parti Tindakan Demokratik (DAP) udah bedanji mayuh macham ngagai rayat Sarawak ba manifesto bepilih besai ke udah lepas.

Kini ke tunga 20 peratus bayar royalti ari minyak enggau gis, 50 peratus chukai ti dikumpul?

“Lalu ke baru tu, siti agi danji manis sida madahka Perintah PH deka nyelamatka Sarawak ari bankrap,” ku iya.

Uggah mega nyakal sekeda ari jaku digaga ketuai DAP menua ti madahka enti enda ketegal ari perintah PH, bansa

Dayak deka seruran enda dikeibuh ba pengawa besai opis lebih agi ba kompeni bekaul enggau perintah (GLC).

Iya madah pemandai bala Dayak udah dipandang diatu ba perintah enggau GLC, baka pengawa nyiri Datuk Jaul Samion ti diatu nyadi Pemangku Sekretari Perintah Nengeri enggau Mohamad Syazwan Abdullah @ Laga Jenggi ti nyadi Ketuai Pemesai Eksekutif MLNG.

“Ngambika rikod mega, Datuk Seri Dr Stephen Rundi nyadi bansa Dayak keterubah megai Kaunsil Pengkalan Bintulu lalu ukai Dr. Anthony Brain ari DAP nengeri alai parti nya dekaka semua rayat Sarawak pechaya,” ku iya.

Uggah mega madah anak Dayak ulih mansang dalam pengawa sida nengah pemujur dikeulih ba pelajar, kualiti sereta komitmen ti betul enggau ulah ti manah.

Iya meri tabi puji ngagai TR Miekle laban udah ngembuan 104 iku orang ke mujur ba pelajar sekula datai ari rumah enggau pemanjai 28 pintu nya, nyengkaum Dr. Stephen Rundi empu.

Berebak enggau nya, iya madah perintah nengeri diatu benung bejalaika pengawa dalam transformayen menua pesisir.

Kitai ngaga tu nengah teknologi betanam betupi moden ti tinggi endur ngulihka pemutus ti manah enggau produktiviti, ku Uggah.

“Pengawa betanam chara lama ukai siti ari pilih diatu enti kitai deka mansutka ulih enggau penatai pemisi ti besai.

“Kitai patut mansang ngagai pengawa betanam komersial lalu pengawa betanam kitai ke diatu benung mansang ngagai jalai nya,” ku iya.

Uggah mega meri terima kasih ngagai Petronas laban bebasaka bansa Dayak nengah mantu bejalaika pengerami Gawai Dayak.

Tu deka nyadi siti pejalai ti panjai alai kitai sama ngetanka penyerakup, penemu enggau pengelikun dalam mayuh macham bansa.

Urung pengerami ti dipejalaika enggau kerejasama ASEAN Bintulu Fertilizer Sdn. Bhd., Gerempung Serikat LNG Malaysia, PETRONAS Carigali Sdn. Bhd, enggau PETRONAS Group of Procument Sarawak nya, urung 1,000 iku mensia mayuh.

Sama ngulu pengerami nya, Ex-Sapit Kepala Menteri Tan Sri Alfred Jabu, Kaban Parlimen Kapit, Datuk Alexander Nanta, Presiden Parti Demokratik Progresif ti mega nyadi Kaban Parlimen Bintulu, Datuk Seri Tiong King Sing, Kaban Kunsil Nengeri (Adun) Repok Datuk Seri Huong Tiong Sii enggau bala bukai.