“Balai bomba mit tu beguna amat dikena nagang penusah angus ke suah nyadi ba rumah panjai enggau menua ulu.”

SIBU: Menteri Pengawa Berumah enggau Kaunsil Kandang Menua (KPKT) Zuraida Kamaruddin merambu ngaga balai bomba mit ba genap rumah panjai di nengeri tu.

Berindik enggau nya, iya merambu ba renggat opis menteri iya numbuhka Balai Bomba Kategori E d Sarawak bepun taun nyin ila.

“Naka tu, penerang pasal pekara tu agi dalam proses lalu deka dipejalaika ba sitak menua ulu kelebih agi di zon Sibu tu.

“Kebuah pia, zon Sibu tu ngembuan mayuh rumah panjai,” ku iya dalam aum media pengudah ngabas Balai Bomba Sungai Merah, ditu kemari.

KENANG BEGULAI… Zuraida(tengah) begambar ungkup kenang enggau raban bomba rambau pejalai gawa iya ngagai balai bomba nya.

Ba pengawa ngabas tu, Zuraida diuluka Direktor Opis Bomba enggau Penyah Penusah Malaysia (JBPM) Nengeri Sarawak Khirudin Drahman, Pemantu Operasyen JBPM Nengeri Sarawak Tiong Ling Hii enggau Pemangku Ketuai JBPM Zon 4 Sibu Wan Kamaruddin Wan Ahmad.

Nitih ku penerang Zuraida, KPKT udah beratika palan dikena ngaga balai mit tu tang enda dibantaika sida.

“Balai bomba mit tu beguna amat dikena nagang penusah angus ke suah nyadi ba rumah panjai enggau menua ulu.

“Balai bomba mit tu deka ngemuntangka pengawa bomba sereta meri pengelantang ngagai sitak ke enda beserimbai pendiau enggau bomba ,” ku iya nerang.

Iya madah, penusah angus di rumah panjai suah nyadi ba nengeri tu lalu perambu ngaga balai tu sebengkah chara nagang penusah tu ari terus nyadi.

Ngelansa pasal perambu nya, Zuraida madah piak bomba ulih ngaga latih komuniti senentang chara ngena perengka pengerara api ngagai peranak nya.

“Latih tu deka ngajar peranak rumah panjai chara nagang penusah angus nyadi kelimpah ngembuan penyedar ke tinggi pasal pengelikun ba rumah sida,” ku Zuraida nambah.

Dikena ngemujurka perambu tu, KPKT deka bekerejasama enggau piak bomba enggau gerempung ukai dikuasa perintah (NGO) ngambi meri penerang pasal balai nya.

“Naka ke diatu, penerang pasal perambu tu agi dalam proses lalu deka nganjung pemesai bomba tauka raban gawa ba balai nya,” ku iya.

Iya mega madah, pemesai bomba tu deka ngemuntangka sida meri latih ngagai peranak rumah panjai.

“Kitai deka ngaga latih ngagai peranak rumah panjai ngambi nagang penusah angus sereta servis bomba ulih dikerembai ngagai semua endur,” ku iya nambah.