BETONG: Kaul rat entara komuniti ari mayuh raban bansa enggau pengarap tu endang penyelai ke bisi di Sarawak lalu patut dikemeran sampai ke ila-ila, pia ku jaku Kaban Parlimen Betong, Datuk Robert Lawson Chuat Vincent Entering.

Lawson madah, adat ngelaluka pengabang tu nyadi daya idup komuniti di nengeri tu tiap musim pengerami ti mandangka penyerakup enggau pengelantang.

“Nya alai, konsep ngelaluka pengabang dalam pengerami besai di nengeri tu dirami begulai enggau komuniti ari pupu raban bansa enggau pengarap patut diteruska.

“Kebuah pia, penyerakup tu ngasuh kitai tu begulai baka diri sebilik taja begulai dalam komuniti ari mayuh bengkah raban bansa enggau pengarap,” ku Robert.

Iya mansutka jaku nya rambau ngarika Sapit Kepala Menteri Datuk Amar Douglas Uggah Embas bejadika Pengerami Aidilfitri Renggat Kampung Melayuh Betong ti diatur di Dewan Panglima Rentap Betong, ditu malam kemari.

RAMI AIDILFITRI… Robert, Rentap sereta temuai ke bukai begambar ungkup kenang enggau komiti pengatur Aidilfitri di Dewan Panglima Rentap, malam kemari.

Pengawa ninting taun Kampung Melayu Betong tu nyendiaka 15 buah bansal ti ngenahka pemakai raya ngagai 500 iku peranak ti datai.

Urung 15 buah bansal bisi ngenah pemakai raya ngagai temuai ti bisi datai disediaka gerempung ukai dikuasa perintah(NGO) sereta gerempung ti bisi ba Kampung Melayu Betong ngena agih belanja ti diberi.

Ba pengerami nya, bisi 34 iku nembiak ti nyult dalam peresa UPSR, PT3, SPM, STPM enggau palan pelajar tinggi ba taun 2019 nerima insentif ari komiti dikena meri peransang ngagai sida ti nyulut dalam pelajar.

Kelimpah ari nya, Robert mega meri bantu RM5,000 ngagai wang turu pelajar Kampung Melayu Betong nyadi peransang ngagai bala nembiak.

Sama datai ba pengerami tu, Adun Layar Gerald Rentap Jabu, Residen Bagi Menua Betong Friday Belik, Pemesai Pelilih Betong Sofhi Jebal sereta ketuai opis, ketuai komuniti enggau ketuai raban bansa.